BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ماكينسك قۇس فابريكاسى ايماقتا سالالىق ليدەر بولا الا ما؟

فوتو: © ptica.kz

baq.kz - شولۋ. جىلدىڭ وندىرىستىك-ەكونوميكالىق "كوزايىمى" - ماكينسك قۇس فابريكاسى. بيىلعى قازان ايىندا ىسكە قوسىلعان بۇل ٴوندىرىس وشاعى 2015 جىلدان باستاپ جوسپارلانعان. سول جىلى العاشقى قازىق قاعىلىپ، ورتا ازياداعى ٴىرى قۇس فابريكاسىنىڭ ٴبىرى بولاتىن قۇرىلىسقا ستارت بەرىلگەن ەدى. ٴبىز وسى جاڭالىققا بايلانىستى قازاقستاننىڭ ايماقتاعى قۇس ەتى وندىرىسىندەگى الەۋەتىن شولىپ وتەيىك.

قازاقستان - قۇس ەتىنىڭ ٴىرى يمپورتەرى. بيىلدىڭ قازان ايىنىڭ وزىندە تەك اقش-تان يمپورتتالاتىن قۇس ەتىنە كۆوتا 140 مىڭ تونناعا دەيىن ٴوسىرىلدى. سەبەبى دۇنيەجۇزىلىك ساۋدا ۇيىمىنىڭ شارتى سونداي. قازاقستان ٴوز نارىعىن ەركىن ساۋدا الاڭىنا اينالدىرۋى ٴتيىس. ال ەركىن نارىقتا اۋىلشارۋاشىلىق ونىمدەرىن وندىرۋدە ونداعان-جۇزدەگەن جىلدىق تاجىريبەسى بار ەلدەردىڭ ابدەن جولعا قويىلعان كونۆەيەرلەرىمەن باسەكەگە ٴتۇسۋ قيىن.

قازاقستان 2017 جىلى 5 ملرد 200 ملن دانا جۇمىرتقا وندىرگەن. بۇل ەلدىڭ سۇرانىسىن تولىق جاۋىپ، جۇمىرتقا ٴتىپتى قىرعىزستانعا، وزبەكستانعا، رەسەيگە، موڭعولياعا، اۋعانستانعا، تاجىكستانعا جانە ت.ب. ەلدەرگە ەكسپورتتالدى. ياعني، "قۇس ونىمدەرى" دەگەن كەزدە، جۇمىرتقا ماسەلەسى تولىعىمەن شەشىلگەن دەۋگە بولادى. ال قۇس ەتى ماسەلەسى - كۇردەلى. قازاقستان ٴالى دە يمپورتتان تاۋەلدى.

تاۋىقتىڭ اق ەتى مەن سانىنىڭ ("وكوروچكا") باسىم بولىگى ٴالى كۇنگە دەيىن شەتەلدەن يمپورتتالادى. بۇل نارىقتاعى جاعدايدى وزگەرتۋ ٴۇشىن «قازاقستان قۇس وسىرۋشىلەر وداعى» 2027 جىلعا دەيىنگى "قۇس ٴوسىرۋ سالاسىن دامىتۋ" باعدارلاماسىن جاساعان بولاتىن. ول باعدارلاما الداعى 2-3 جىل كولەمىندە قۇس ەتىنە ىشكى سۇرانىستى تولىعىمەن جاۋىپ قانا قويماي، ونى ەكسپورتتاي باستاۋ دا كوزدەلگەن.

جالپى، باسەكە قاتتى قۇس ەتى مەن جۇمىرتقا نارىعى قازاقستان ٴۇشىن قولايسىز دەۋگە بولادى. مىسالى، 2011 جىلدارى رەسەي مەن بەلارۋس قازاقستان نارىعىندا ايقىن دەمپينگ جاسادى. مىسالى رەسەي ٴوز نارىعىندا تاۋىق ەتى كوبەيسە، ونى كورىڭەۋ ارزانداتىپ، قازاقستان نارىعىنا لاقتىراتىن. ال بەلارۋس بولسا، نارىعىمىزدى ساقتاۋ مەرزىمى بىتۋىنە بىرنەشە تاۋلىك قالعان جۇمىرتقامەن تولتىرىپ وتىردى. كەدەندىك وداقتىقتىڭ پايداسى مەن زيانى تۋرالى ماسەلەلەر دە وسى تۇستاردا كوتەرىلدى.

سيپاتتالعانداي احۋالدا جالقى نەمەسە شاعىن قۇس وسىرۋشىلەردىڭ قۇس ەتى دە، جۇمىرتقا دا نارىقتارىندا باسەكەگە قابىلەتى جوق دەپ ايتپاساق تومەن بولعانى ٴسوزسىز. جاعدايدى تەك - تولىق تەحنولوگيالىق سيكلمەن قۇس ەتىن وندىرەتىن ٴىرى وندىرىستىك وشاقتار شەشەتىنى تۇسىنىكتى. ەندەشە ىسكە قوسىلعان ماكينسك قۇس فابريكاسى - وسى احۋالعا تىكەلەي جاۋاپ.

جاڭا قۇس فابريكاسىن جوبالانۋ كەزەڭىنەن باستاپ ەكونوميكالىق ساۋاتتى ۇيىمداستىرىلعان دەۋگە بولادى. سەبەبى جاي فابريكا ەمەس، بىردەن - ورتا ازياداعى ٴىرى قۇس ٴوسىرۋ فابريكاسى رەتىندە ويلاستىرىلعانى قازاقستاندى كۇندەلىكتى ٴمازىردىڭ بۇل تۇرىنەن تاۋەلدىلىكتەن قۇتقارىپ قانا قويماي، نارىقتا ەكسپورتەر رەتىندە كورىنۋىنە دە جول اشادى.

تاۋلىگىنە 8 مىڭ بويلەر سوياتىن بۇل وندىرىستىك كەشەن شەكارالاس ەلدەردىڭ بارلىعىنا توتەپ بەرە الادى. 7 مىڭ شاقىرىمدىق ورتاق شەكارامىز بار رەسەي فەدەراسياسىنىڭ قازاقستانمەن استاسقان اۋداندارىندا مۇنداي ٴىرى كەشەن كورىنبەيدى. ال وزبەكستاننىڭ قۇس ەتى ٴوندىرىسى كوبىنە فەرمەرلىك قوجالىقتاردىڭ قولىندا. ازىق-تۇلىك نارىعىندا ارزان ەڭبەك كۇشى فاكتورىنىڭ ارقاسىندا ادەتتە قۋاتتى وزبەكستان ٴدال وسى قۇس ەتىنەن كەنجەلەپ ٴجۇر. بىلتىرعى قازان ايىنىڭ وزىندە تەك رەسەيدەن 441 مىڭ $ ٴتۇرلى ساناتتاعى قۇس ەتىن يمپورتتاعان. ەندەشە و باستاعى جوسپار ٴبىرىزدى بولسا، ماكينسك قۇس فابريكاسى ايماق نارىعىنا جول اشاتىن مۇزجارعىش ەسەبىندەگى قۋاتتى وشاق بولاتىنى كورىنىپ تۇر.

نازار دابىل


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي