استانا: 
5268 
2
اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاما اياسىندا اۋىل تۇرعىندارى مەن كووپەراتيۆتەر جەڭىلدەتىلگەن نەسيەگە قول جەتكىزۋى مۇمكىن. مەملەكەت وسى باعىتقا 27 ملرد تەڭگە ٴبولۋدى جوسپارلاپ وتىر. بۇل تۋرالى ورتالىق كوممۋنيكاسيالار قىزمەتىندە وتكەن ٴباسپاسوز قىزمەتىندە قر اشم مال شارۋاشىلىعى ونىمدەرىن ٴوندىرۋ جانە قايتا وڭدەۋ دەپارتامەنتىنىڭ ديرەكتورى ەركەبۇلان احمەتوۆ مالىمدەدى، دەپ حابارلايلى baq.kz ٴتىلشىسى.
«اۋىل تۇرعىندارىنا نەسيە بەرۋ ماسەلەسىنە توقتالايىق. بۇل جۇمىس 2017 جىلدان باستاپ مينيسترلىكتىڭ تىكەلەي باقىلاۋىمەن جۇرگىزىلەدى. اۋىل شارۋاشىلىعى كووپەراتيۆتەرىنە، اۋىلداعى جەكە كاسىپكەرلەرگە، بيزنەسىن جاڭادان باستاعان كاسىپكەرلەرگە شاعىن نەسيە بەرىلەدى. نەسيەنىڭ كولەمى – 16 ملن تەڭگە. نەسيە بەلگىلى ٴبىر ٴونىمدى وندىرگەنى ٴۇشىن بەرىلەدى. پايىزدىق ۇستەمەسى – 6%. شارۋا نەسيەنى 7 جىلدىڭ ىشىندە قايتارۋى كەرەك»، - دەدى دەپارتامەنت ديرەكتورى.
سونىمەن قاتار، ەركەبۇلان احمەتوۆ شارۋالارعا بەرىلەتىن نەسيەنىڭ ۋاقىتى نەگە ۇزارتىلعاندىعىن تۇسىندىرۋگە تىرىستى.
«بۇرىن شارۋالار 3 ملن تەڭگەنى 5 جىلعا الاتىن. نەگە نەسيەنىڭ ۋاقىتىن ۇزارتتىق؟ كوپ جاعدايدا جاڭادان قۇرىلعان كووپەراتيۆتەر مال شارۋاشىلىعىمەن اينالىسادى. ياعني جەڭىلدەتىلگەن نەسيەنىڭ 80%-ىن وسى سالانىڭ وكىلدەرى الىپ وتىر. سوندىقتان، ماماندار وسى جاعدايدى ەسكەرە كەلە، نەسيەنىڭ مەرزىمىن ۇزارتۋدى ٴجون سانادى. جالپى تاۋار ٴوزىن-وزى اقتاعان كەزى بولادى عوي. وسى جاعدايدى ەسكەردىك. ول ٴۇشىن 5 جىل تىم از. سوعان بايلانىستى نەسيەنى 7 جىلعا ۇزارتتىق»، - دەدى ول.
دەپارتامەنت باسشىسى اۋىل تۇرعىندارىنىڭ ٴال-اۋقاتىن ارتتىرىپ، وڭىرلەردەگى كووپەراتيۆتەردىڭ جۇمىسىن جانداندىرۋ ماقساتىندا مەملەكەتتەن قوماقتى قارجى بولىنەتىندىگىن اتاپ ٴوتتى.
«ەندى نەسيەنىڭ كولەمىنە توقتالايىق. 2017 جىلى اۋىلداعى كووپەراتيۆتەرگە، جەكە كاسىبىن اشقىسى كەلەتىن اۋىل تۇرعىندارىنا جەڭىلدەتىلگەن نەسيە تۇرىندە 27 ملرد تەڭگە ٴبولۋ جوسپارلانىپ وتىر. ارنايى كريتەريي جوق. ياعني اۋىلدا ٴوزىن-وزى جۇمىسپەن قامتىپ وتىرعان ازامات ٴوز باعىن سىناپ كورە الادى»، - دەدى ول.
سونداي-اق، اوك-تى دامىتۋدى كوزدەيتىن مەملەكەتتىك باعدارلاما بويىنشا شارۋالارعا كوكتەمگى ەگىس جۇمىستارىن جۇرگىزۋگە بەرىلەتىن نەسيەنىڭ كولەمى دە قىسقارتىلادى.
«2017 جىلى شارۋالارعا بەرىلەتىن كوكتەمگى ەگىس جۇمىستارىن جۇرگىزۋگە بەرىلەتىن نەسيەنىڭ كولەمى 7،4%-دان 3%-عا دەيىن تومەندەيدى. مەملەكەت جىل سايىن وسى باعىتقا 64 ملرد تەڭگە بولەدى»، - دەدى ە. احمەتوۆ.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3000
0