قازاقستاندىق عالىمدارى جىلدام ٴونىم بەرەتىن كارتوپ سورتىن دايىنداپ شىعاردى

س. امانجولوۆ اتىنداعى شقمۋ-دىڭ عالىمدارى شىعىمى جوعارى، ٴارى جەرگىلىكتى كليماتقا بەيىمدەلگەن كارتوپ سۇرىپتارىن ويلاپ تاپتى.

تاۋلى دا جازىقتى، سۋلى دا نۋلى، اڭىزاق ٴشولى دە كەزدەسەتىن ٴبىزدىڭ وڭىرگە كەز كەلگەن وسىمدىك جەرسىنە بەرمەيدى. وسىنى ەسكەرگەن ۋنيۆەرسيەتتىڭ اعا وقىتۋشىسى، اۋىل شارۋاشىلىعى عىلىمىنىڭ كانديداتى گالينا كۋزمينا ولكە جاعدايىنا بەيىمدەلگەن، جاڭبىر مەن شولگە بىردەي ٴتوزىمدى، جوعارى سۇرىپتى كارتوپ ٴونىمىن زەرتتەپ، مەملەكەتتىك سۇرىپ سىناعىنا جىبەردى. ول تۋراسىندا زەرتتەۋ ورتالىعىنىڭ عىلىمي قىزمەتكەرى، بيولوگيا ماگيسترى اراي مۇراتحانقىزى بايانداپ بەردى.

- مەملەكەتتىك سۇرىپ سىناعىنا جىبەرگەن جوبانىڭ تاقىرىبى «شىعىس قازاقستان ايماعىندا ٴوزىمىزدىڭ جانە تمد ەلدەرىنىڭ سەلەكسياسىنىڭ ٴتوزىمدى ٴارى ونىمدىلىگى جوعارى كارتوپ سۇرىپتارىن ىرىكتەپ الۋ». وسى جوبا بويىنشا ەرەكشە كوزگە تۇسكەن «ۋداچا» جانە «سانتە» اتتى ەكى سۇرىپتى اۋىل شارۋاشىلىعى مينيسترلىگىنە ۇسىندىق. سونداي-اق، 32 گيبريدتىڭ ىشىنەن تاڭدالعان «شىعىس»، «يزولدا»، «تاۆريا» اتتى ٴۇش گيبريدكە دە سۇرىپ شەنىن بەرمەك ٴۇشىن ۇسىنىس جاساپ وتىرمىز، - دەيدى عالىم.

جالپى ۋنيۆەرسيتەت كوللەكسياسىندا 60-قا جۋىق كارتوپ سۇرىبى بار. الداعى كۇندەرى وسى 60 سۇرىپتىڭ ىشىنەن 50 ٴتۇپ كارتوپ وسكىنىن «ۇلان-جەمىس» شارۋاشىلىعىنا ەگۋ جوسپارلانعان. ال قالعان ونشاقتى سورت قالەمشەلەۋ ٴادىسى جانە ميكروتۇينەكتەرىن الۋ ٴادىسى ارقىلى قايتادان كوبەيتىلەدى.

- ٴقازىر وڭىردە ەگىلەتىن كارتوپ تۇقىمدارىنىڭ كوبى گوللانديا، رەسەي، گەرمانيا سياقتى ەلدەردەن اكەلىنەدى. سولاردىڭ ورنىن جەرگىلىكتى تۇقىمدارمەن الماستىرۋ ماقساتىندا كارتوپ سۇرىپتارىن الۋعا نەگىزدەلگەن عىلىمي-زەرتتەۋ جۇمىستارىن جۇرگىزىپ كەلەمىز. ويتكەنى، شەت ەلدەن اكەلىنگەن كارتوپ سۇرىپتارى ٴبىزدىڭ اۋماعىمىزدىڭ كليماتتىق جاعدايىنا بەيىمدەلمەگەن. سوندىقتان، بۇل شەتەلدىك سۇرىپتار كۇتىمى كەلسىپەگەن جاعدايدا ەكى-ۇش جىل وتپەي جاتىپ ٴوز ونىمدىلىكتەرىن جوعالتادى، - دەيدى اراي مۇراتحانقىزى.

جوبانىڭ ەرەكشەلىگى سول، اتالعان سۇرىپتار باس-اياعى 70-75 كۇننىڭ ىشىندە ٴونىم بەرە الادى. مامىر ايىندا تىڭعا تۇرەن سالعان ديحان ەل تامىز ايىنىڭ باسىندا-اق كۇرەك-سايمانى مەن قانار-قابىن قامداي بەرسە بولادى.

دەرەككوز: kaz.altaynews.kz

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!