قازاقستان قىتاي نارىعىنا ەت ونىمدەرىن ەكسپورتتاماق

فوتو: Бауыржан Жуасбаев

قازاقستان يزرايل، كۋۆەيت مەملەكەتتەرىنە قوي ەتىن جەتكىزۋ جانە دە مالايزيا، جاپونيا، وڭتۇستىك كورەيا، ەۋرو وداق ەلدەرىنە قۇرعاق بيە ٴسۇتىن، قىتاي نارىعىنا سيىر، شوشقا ەتتەرىن، ٴسۇت، قۇس ونىمدەرىن ەكسپورتتاۋ ماسەلەسى بويىنشا كەلىسسوزدەر جۇرگىزبەك. بۇل تۋرالى استانادا ٴوتىپ جاتقان اگروونەركاسىپتىك ينۆەستيسيالىق فورۋمدا قر اۋىل شارۋاشىلىعى ٴمينيسترى اسقار مىرزاحمەتوۆ مالىمدەدى، دەپ حابارلايدى baq.kz اقپارات اگەنتتىگىنىڭ ٴتىلشىسى.

ٴمينيستردىڭ ايتۋىنشا، ينتەگراسيالىق پروسەستەر جاعدايىندا قازاقستانعا باسەكەلەستىككە قول جەتكىزۋ ٴۇشىن حالىقارالىق وزىق تاجىريبەنىڭ ترانسفەرتى قاجەت. تىكەلەي شەتەلدىك ينۆەستيسيالاردى تارتۋ جانە اۋىل شارۋاشىلىعى سالاسىندا ٴوزارا ٴتيىمدى نەگىزدە بىرلەسكەن ٴوندىرىس قۇرۋ قازاقستان ٴۇشىن ماڭىزدى بولىپ وتىر.

«وزدەرىڭىزگە ٴمالىم، قازاقستان مەملەكەتتىك رەتتەۋ مەن ينۆەستورلاردى قولداۋ باعىتىندا كوپتەگەن جەتىستىكتەرگە قول جەتكىزدى. ەلىمىزگە تارتىلعان ينۆەستيسيالارعا قولايلى جاعداي جاساۋ بويىنشا تمد ەلدەرى اراسىندا كوشباسشىلاردىڭ ٴبىرى بولىپ سانالادى. قازىرگى تاڭدا قحر كومپانيالارىمەن استىقتى، مايلى داقىلداردى، وسىمدىك مايىن ەكسپورتتاۋ ٴۇشىن كەلىسىم شارتقا قول قويىلسا، اراب امىرلىگى مەن يرانعا جاسىمىق تاسۋ ٴۇشىن كومپانيالارمەن كەلىسىمگە قول قويۋ قايتا وڭدەلۋدە، ال، رەسەي، يزرايل، گونكونگ ەلدەرىنىڭ كومپانيالارىمەن كۇنباعىس تۇقىمىن، قاتتى بيداي، ۇن، نوقات، بۇرشاق، قوي ەتىن تاسىمالداۋ ٴۇشىن كەلىسوزدەر جۇرگىزىلۋدە»، - دەپ مالىمدەگەن مينيستر اسقار مىرزاحمەتوۆ قازاقستانعا ينۆەستيسيا قۇيا وتىرىپ قىتاي، رەسەي جانە ەىەۇ ەلدەرى نارىعىنا شىعۋعا مۇمكىندىك بارىن تىلگە تيەك ەتتى.

سونىمەن بىرگە، قىتاي نارىعىنا سيىر، شوشقا ەتتەرىن، ٴسۇت، قۇس ونىمدەرىن، ٴتىرى جانۋارلار، سونىڭ ىشىندە جىلقىلاردى شىعارۋ جوسپارلانۋدا. ال، پارسى شىعاناعى ەلدەرى بويىنشا كەلىسسوزدەر اياقتالۋعا جاقىن.

ەسكە سالا كەتەيىك، 25 تامىزدا استانادا قر اۋىل شارۋاشلىعى مينيسترلىگى «كازاگرو» ۇلتتىق حولدينگىمەن بىرلەسە وتىرىپ «agroinvest forum 2017» اگروونەركاسىپتىك ينۆەستيسيالىق فورۋمى وتۋدە. بۇل شاراعا الەمنىڭ 18 ەلىنەن شامامەن 200-دەن استام قاتىسۋشى، سونىڭ ىشىندە ٴىرى شەتەلدىك ينۆەستيسيالىق قورلار مەن قارجى ۇيىمدارىنىڭ شامامەن 40 وكىلى بار. وسى فورۋم اياسىندا قازاقستاننىڭ اۋىل شارۋاشىلىعى سالاسىن ەكونوميكالىق ٴارتاراپتاندىرۋ تۇرعىسىندا ٴبىرقاتار ماڭىزدى كەلىسىمدەر مەن مەموراندۋمدارعا قول قويىلماق.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!