1343 
0
بۇگىن وڭتۇستىك قازاقستان وبلىسىندا ەكى ەل اراسىنداعى ىنتىماقتاستىقتى ارتتىرىپ، كاسىپكەرلەرگە ۇلكەن مۇمكىندىكتەر جاساۋ ماقساتىندا قازاق-وزبەك بىرلەسكەن بيزنەس كونفەرەنسياسى ٴوتتى، دەپ حابارلايدى baq.kz.
استانا: 
بۇگىن وڭتۇستىك قازاقستان وبلىسىندا ەكى ەل اراسىنداعى ىنتىماقتاستىقتى ارتتىرىپ، كاسىپكەرلەرگە ۇلكەن مۇمكىندىكتەر جاساۋ ماقساتىندا قازاق-وزبەك بىرلەسكەن بيزنەس كونفەرەنسياسى ٴوتتى، دەپ حابارلايدى baq.kz.
كونفەرەنسيا جۇمىسىنا وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ پەن قازاقستاننىڭ وزبەكستانداعى توتەنشە جانە وكىلەتتى ەلشىسى ەرىك وتەمبايەۆ، قوس مەملەكەتتىڭ 70-كە جۋىق كاسىپكەرى قاتىستى.
بيزنەس كەزدەسۋدە ٴسوز العان ٴوڭىر باسشىسى بارشا قوناقتارعا العىسىن ٴبىلدىرىپ، بۇگىنگى جيىن ەكىجاقتى قاتىناستى دامىتۋدا پايدالى الاڭ بولاتىنىنا سەنىم ٴبىلدىردى.
«وڭتۇستىك قازاقستان وبلىسىنىڭ اكىمدىگى ينۆەستيسيالىق جوبالاردى ىسكە اسىرۋدا جان-جاقتى قولداۋ كورسەتۋگە دايىن. ٴبىزدىڭ مەملەكەتتە يندۋستريالدى-يننوۆاسيالىق دامۋ باعدارلاماسى بەلسەندى جۇزەگە اسىرىلىپ، ول قازىرگى ۋاقىتتا وبلىس ەكونوميكاسىنىڭ دامۋىنا سەپتىگىن تيگىزىپ كەلەدى. دامىعان الەم ەلدەرىنىڭ تاجىريبەسى كورسەتكەندەي، يندۋستريالدى ايماقتار ينۆەستورلاردى تارتۋدىڭ نەگىزگى قۇرالى بولىپ تابىلادى. بۇگىندە وبلىستىڭ قالالارى مەن اۋداندارىندا 11 يندۋستريالدى ايماق جۇمىس ىستەيدى. وڭدەۋشى ونەركاسىپ باعىتىنداعى جوبالاردى ىسكە اسىرۋشى ينۆەستورلار ٴۇشىن ٴبىز اتالعان ايماقتان جەر ۋچاسكەلەرىن ٴبولىپ بەرۋگە ٴازىرمىز. سونىمەن قاتار، وسىندا وندىرىلگەن ٴونىمدى ەۋرازيالىق ەكونوميكالىق وداققا مۇشە ەلدەر مەن قحر-عا ەكسپورتتاۋعا مۇمكىندىك بار»، -دەدى اكىم.
ٴوز كەزەگىندە، ەلشى ەرىك وتەمبايەۆ وبلىس باسشىسىنا وڭتۇستىكتە قازاق-وزبەك اگرو يندۋستريالدى ايماعىن سالۋدى جانە تاشكەنت قالاسىمەن عانا ەمەس، وزبەكستاننىڭ بارلىق ايماقتارىمەن دە ارىپتەستىك بايلانىس ورناتۋدى ۇسىندى.
«ەكى جاقتىڭ كليماتى ۇقساس بولىپ كەلگەندىكتەن مۇندا كوكونىس ٴوسىرۋ شارۋاسىن دامىتۋعا بولادى. جانە قوس ەل اراسىنداعى تۋريزم سالاسىن وركەندەتۋ ماقساتىندا ۇلى جىبەك جولىن قايتا جاڭعىرتۋىمىز كەرەك. بۇل باعىتتا قازىرگى تاڭدا ٴتيىستى جۇمىستار مەن كەلىسسوزدەر جۇرگىزىلىپ جاتىر»، - دەدى ەلشى.
بۇل رەتتە، قازاقستاننىڭ وزبەكستانداعى ەلشىسى «سامارقان – شىمكەنت – تۇركىستان» مەن «شاردارا – جەتىساي – جىزاق» باعىتتارىندا جۇرەتىن اۆتوبۋستار قاتىناسىنىڭ ورناتىلاتىنىن مىسال رەتىندە كەلتىردى.
سونىمەن قاتار، مارتەبەلى مەيمان وڭتۇستىكتەگى «حيمفارم» اق ٴوندىرىسى شىعاراتىن دارى-دارمەك كورشىلەس وزبەك ەلىندە سۇرانىسقا يە ەكەنىن ايتىپ، بۇگىندە دارى-دارمەك ونىمدەرىن جۇيەلى تۇردە ساتىپ الۋعا نيەتتى ەكەنىن جەتكىزدى.
قوس تاراپتى كەزدەسۋ بارىسىندا وقو كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارماسىنىڭ باسشىسى مارات قارابايەۆ وڭتۇستىكتىڭ كاسىپكەرلىك سالاسىنداعى مۇمكىندىكتەرىمەن تانىستىردى. سونىمەن قاتار، تۋريزم باعىتىن دامىتۋ جايىن دا باياندادى.
ايتا كەتەيىك، 2015 جىلى ەكى ەلدىڭ اراسىنداعى تاۋار اينالىمى 1،67 ملرد. اقش دولللارىنا جەتكەن. وسى سىندى كەزدەسۋلەردىڭ ناتيجەسىندە ەكسپورت پەن يمپورتتىڭ كولەمىن ارتتىرۋ كوزدەلىپ وتىر. بۇگىندە وزبەكستان مەملەكەتىنەن كوگىلدىر وتىن، ماقتا تالشىقتارى، حيميالىق ونىمدەر، تىڭايتقىشتار مەن كوكونىستەر يمپورتتالادى، دەپ حابارلايدى وقو اكىمىنىڭ ٴباسپاسوز قىزمەتى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3000
0