استانا: 
ەلىمىزدە ەگىندى جيناۋ جۇمىستارى قارقىندى تۇردە جۇرگىزىلۋدە. 2017 جىلدىڭ 12 قىركۇيەگىنە دەيىنگى دەرەككە سايكەس ەلىمىزدە 11،6 ملن گەكتار ەگىن جينالدى. ال ەگىن جيناۋ جۇمىستارى ٴۇشىن ايماقتار ارزانداتىلعان جانار-جاعارمايمەن قامتاماسىز ەتىلدى. بيىلعى ناۋقان ۋاقىتىلى اياقتالادى دەپ جوسپارلانۋدا. بۇل تۋرالى ۇكىمەت وتىرىسىندا قر اۋىل شاراۋشىلىعى ۆيسە-مينيسترى قايرات ايتۋعانوۆ مالىمدەدى، دەپ حابارلايدى baq.kz اقپارات اگەنتتىگىنىڭ ٴتىلشىسى.
«قازىرگى ۋاقىتتا رەسپۋبليكانىڭ بارلىق وڭىرىندە ەگىن جيناۋ جۇمىستارى قارقىندى جۇرۋدە. 12 قىركۇيەكتەگى جاعداي بويىنشا 11،6 ملن گەكتاردىڭ ەگىنى جينالدى. ورتاشا ونىمدىلىگى گەكتارىنا 12،6 سەنتنەر بولىپ، 14،7 ملن توننا استىق ورىلدى»، - دەدى ول.
قايرات ايتۋعانوۆ ەگىندى جيناۋ جۇمىستارىنىڭ قالاي جۇرگىزىلىپ جاتقانىنا دا توقتالدى.
«ەگىندى جيناۋ قارقىنى وتكەن جىلمەن سالىستىرعاندا 2،4 ملن گا نەمەسە 16%-عا ارتىق. رەسپۋبليكا بويىنشا بارلىق ەگىس القابىنىڭ 76،7%-ى جينالدى. ەندى وڭىرلەرگە توقتالايىن. اقمولا وبلىسىندا – 3،5 ملن توننا بيداي، سولتۇستىك قازاقستان وبلىسى – 3،3 ملن توننا بيداي، قوستاناي وبلىسىندا 3،8 ملن توننا بيداي جينالدى. وڭتۇستىك قازاقستان وبلىسى، جامبىل جانە باتىس قازاقستان وبلىستارىندا 1،4 ملن توننا ماساقتى ٴداندى داقىلدار جينالدى. بۇل وتكەن جىلمەن سالىستىرعاندا 3،5%-عا ارتىق»، - دەدى ۆيسە-مينيستر.
سونىمەن قاتار ول ارپا، باۋ-باقشا جانە مايلى داقىلداردى جيناۋ جۇمىستارىنىڭ بارىسىن باياندادى.
«ارپانى جيناۋ جۇمىستارى دا اياقتالدى. قازىرگى ۋاقىتتا 1،8 ملن گا نەمەسە اۋماقتىڭ 86%-ى جينالىپ، 2،7 ملن توننا ٴونىم الىندى. مايلى داقىلدار بويىنشا جالپى اۋماقتىڭ 24%-ى جينالىپ، 1،2 ملن توننا ٴونىم الىندى. بۇل كورسەتكىش وتكەن جىلمەن سالىستىرعاندا 10%-عا ارتىق. باقشا داقىلدارىن جيناۋ جۇمىستارى دا جالعاسۋدا. الماتى، جامبىل جانە وڭتۇستىك قازاقستان وبلىستارى بويىنشا اۋماقتىڭ 76%-ى جينالىپ، 3،1 ملن توننا ٴونىم الىندى. بۇل وتكەن جىلمەن سالىستىرعاندا 13%-عا ارتىق. بيىل قانت قىزىلشاسى وتكەن جىلمەن سالىستىرعاندا 1،5 ەسەگە ارتىق جينالادى دەپ جوسپارلانۋدا»، - دەدى ٴمينيستردىڭ ورىنباسارى.
ٴسوز سوڭىندا قايرات ايتۋعانوۆ ديقانداردىڭ ارزانداتىلعان جانار-جاعارمايمەن قامتاماسىز ەتىلگەنىن اتاپ ٴوتتى.
«ەگىن جيناۋ جۇمىستارى ٴۇشىن ايماق ارزانداتىلعان جانار-جاعارمايمەن قامتاماسىز ەتىلدى. استىق قابىلداۋ كاسىپورىندارىنىڭ ماتەريالدىق-تەحنيكالىق بازاسى جاڭا ەگىن استىعىن قابىلداۋعا دايىن. استىق ساقتاۋ قويمالارىنىڭ رەيتينگىسىن انىقتاۋ ادىستەمەسى ازىرلەندى. وسى جىلدان باستاپ، «ازىق-تۇلىك كەلىسىم-شارت كورپوراسياسى» رەيتينگى تومەن استىق قابىلداۋ كاسىپورىندارىمەن جۇمىس ىستەمەيتىن بولادى. وسى جىلى ەگىن جيناۋ ناۋقانى ۋاقىتىلى اياقتالادى دەپ بولجانۋدا»، - دەپ تۇيىندەدى ٴسوزىن ۆيسە-مينيسترى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1535 
0
3000
0