استانا: 
2161 
0
بۇگىن قر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسىندا قر اۋىل شارۋاشىلىعى ٴبىرىنشى ۆيسە-مينيسترى قايرات ايتۋعانوۆ 2017 جىلعى كوكتەمگى ەگىس جۇمىستارىن وتكىزۋ قورىتىندىلارى تۋرالى باياندادى، دەپ حابارلايدى baq.kz ٴتىلشىسى.
«بيىل ەلىمىزدەگى ەگىس القابىنىڭ جالپى اۋدانى 22،5 ملن گەكتاردى قۇرادى، بۇل وتكەن جىلمەن سالىستىرعاندا 650 مىڭ گەكتارعا كوپ. ەگىن ەگۋ جۇمىستارىن ٴارتاراپتاندىرۋ اياسىندا سۇرانىسى جوعارى داقىلداردى ەگەتىن القاپتار 1 ملن 348 مىڭ گەكتارعا ۇلعايتىلدى، بۇل اگرارلىق-ونەركاسىپتىك كەشەندى دامىتۋ مەملەكەتتىك باعدارلاماسىنىڭ جوسپارلانعان ينديكاتورىنان 340 مىڭ گەكتارعا جوعارى كورسەتكىش»، - دەدى ۆيسە-مينيستر.
ايتۋعانوۆتىڭ ايتۋىنشا، جاسىمىق ەگىسىن ۇلعايتۋ قازاقستانعا الەمدە اۋماق بويىنشا بەسىنشى جانە ەكسپورت بويىنشا ٴتورتىنشى ورىندى يەلەنۋگە مۇمكىندىك بەرەدى. بۇدان وزگە، بيىل قانت ٴوندىرىسى ٴبىر جارىم ەسەگە، مايلى داندەر 1،3 ەسەگە ۇلعايتىلادى دەپ كۇتىلۋدە. جۇزەگە اسىرىلىپ جاتقان ٴارتاراپتاندىرۋ جۇمىستارى ٴار گەكتاردىڭ تيىمدىلىگى مەن ٴوندىرىستىڭ تابىستىلىعىن ارتتىرادى.
«تۇقىم شارۋاشىلىعىنا قولداۋ كورسەتۋ قاراجاتتارىنىڭ كولەمى وتكەن جىلمەن سالىستىرعاندا 3،3 ەسەگە ٴوستى. بىرەگەي جانە ەليتالىق تۇقىمدار ٴوندىرىسى قايتا قالپىنا كەلتىرىلدى جانە تۇقىم شارۋاشىلىعىنا قولداۋ كورسەتۋدىڭ وزگە دە شارالارى قابىلداندى. سونداي-اق، مينەرالدى تىڭايتقىشتاردى سۋبسيديالاۋ تەتىگىن قايتا قاراۋ ولاردى قولدانۋ كولەمىن ۇلعايتۋعا مۇمكىندىك بەردى»، - دەيدى قايرات ايتۋعانوۆ.
ونىڭ مالىمەتىنشە، كوكتەمگى ەگىس جۇمىستارىن جۇرگىزۋگە قاجەتتى ديزەلدىك وتىنعا دەگەن سۇرانىس تولىعىمەن قامتاماسىز ەتىلدى. قر ۇكىمەتىنىڭ جازدىق ەگىس كەزەڭىندە اكسيزدەردىڭ مولشەرلەمەسىن تومەندەتۋ تۋرالى شەشىمى ديزەلدىك وتىن باعاسىن رەسپۋبليكا بويىنشا ورتا ەسەپپەن ليترىنە 123 تەڭگەگە دەيىن تومەندەتۋگە مۇمكىندىك بەردى. ەگىستەردى حيميالىق وڭدەۋ بويىنشا قورعاۋ شارالارىن جۇرگىزۋ ٴۇشىن ەلىمىزدىڭ وڭتۇستىك وڭىرلەرىنە قوسىمشا پەستيسيدتەر مەن تەحنيكالار جەتكىزىلدى.
«591 مىڭ گا جەر وڭدەلدى. اۋىل شارۋاشىلىعى جەرلەرىنە زاقىم كەلتىرىلگەن جوق. وزگە وڭىرلەردە ٴۇيىرلى كوكقاسقا شەگىرتكەلەردەن قورعاۋ شارالارى جوسپار بويىنشا جۇرگىزىلىپ جاتىر»، - دەدى قر اشم ٴبىرىنشى ۆيسە-مينيسترى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
قىمبات ەلتايقىزى 
3000
0