استانا: 
2016 جىلدىڭ 26 قازانىندا استانادا ەكىنشى قازاقستاندىق ٴسۇت كونگرەسى ٴوز جۇمىسىن باستادى. شارانىڭ ۇيىمداستىرۋشىلارى ەۋروپالىق قايتا قۇرۋ جانە دامۋ بانكى، dairy global experts جانە بۇۇ ازىق-تۇلىك جانە اۋىلشارۋاشىلىق ۇيىمىنىڭ ينۆەستيسيالىق ورتالىعى (بۇۇ فاو). شاراعا شەتەلدىك جانە قازاقستاندىق ٴسۇت ونىمدەرىن وندىرۋشىلەر مەن فەرمەرلەر، سالا ساراپشىلارى، اسسوسياسيالار مەن بىرلەستىكتەر وكىلدەرى، سونداي-اق بۇۇ ازىق-تۇلىك جانە اۋىلشارۋاشىلىق ۇيىمىنىڭ جانە ەقدب ساراپشىلارى قاتىستى، دەيدى baq.kz ٴتىلشىسى.
«بۇل كونگرەسس قازاقستاندىق ٴسۇت يندۋسترياسىنىڭ ماڭىزدى جانە كوكەيتەستى سۇراقتارىن بەلسەندى تالقىلايتىن ورىن بولادى دەپ ۇمىتتەنەمىز. ناتيجەسىندە بارلىق قاتىسۋشىلار سۇراقتارىنا جاۋاپ تاۋىپ، بيزنەستى دامىتۋ بويىنشا ناقتى قادامداردى قالىپتاستىرادى دەپ سەنەمىز» - دەيدى ەقدب قازاقستان بويىنشا ديرەكتورى دجانەت حەكمان.
كونگرەسكە قاتىسۋشىلار شيكى ٴسۇتتىڭ ساپاسىن، ٴسۇت فەرماسىن تابىستى بيزنەسكە اينالدىرۋ، شىعىنداردى وڭتايلاندىرۋ، دامىتۋعا قارجى تابۋ، ٴسۇت بيزنەسىنىڭ ەكونوميكالىق تيىمدىلىگىن جاقسارتۋ، باسەكەلەستىكتى ارتتىرۋ سەكىلدى ماسەلەلەردى ٴوزارا تالقىلاپ، سالا ساراپشىلارىمەن پىكىر الماستى.
«قازاقستاننىڭ ٴسۇت ونىمدەرىن وندىرۋشىلەرىنە ساپالى شيكى ٴسۇت كەرەك جانە دۇنيەجۇزى بويىنشا جۇمىس ىستەيتىن ۇيىم رەتىندە ٴبىزدىڭ مىندەتىمىز قازاقستاندىق ٴسۇت شارۋاشىلىعىن پايدالى ەتەتىن ناقتى شەشىمدەر ۇسىنۋ» - دەيدى بۇۇ ازىق-تۇلىك جانە اۋىلشارۋاشىلىق ۇيىمىنىڭ ينۆەستيسيالىق ورتالىعىنىڭ مامانى يننا پۋندا.
ەقدب قازاقستاندا اۋىل شارۋاشىلىعى مەن ازىق-تۇلىك ٴوندىرىسىن 1998 جىلدان بەرى قولداپ كەلەدى. سودان بەرى بانك شاعىن جانە ورتا بيزنەسپەن 400 اسا كونسالتينگتىك جوبانى ىسكە اسىردى. ەقدب ٴسۇت سالاسىنىڭ كومپانيالارىنا ٴونىم ساپاسىن جاقسارتۋعا، شىعىنداردى ازايتۋعا، ماركەتينگ پەن ديستريبۋسيانىڭ ٴتيىمدى ستراتەگيالارىن ەنگىزۋگە، ەنەرگوتيىمدىلىك قاعيدالارىن پايدالانۋعا جانە باسقا دا كوپتەگەن ماسەلەلەردى شەشۋگە كومەكتەستى.
تاعى ٴبىر اتاپ وتەتىنى ەقدب جانە فاو 2015 جىلى باستالعان «قازاقستاندا ٴسۇتتىڭ قوسىمشا قۇن تىزبەگىنىڭ ينكليۋزيۆتىگىن قولداۋ» جوباسى اياسىندا ٴسۇت وندىرۋشىلەرىمەن جۇمىس ىستەپ كەلەدى. جوبا ماقساتى زاماناۋي شەشىمدەر ۇسىنىپ، شاعىن جانە ورتا ٴسۇت وندىرۋشىلەرىن شيكى ٴسۇتتى جيناۋ ۇردىسىنە كەڭىرەك تارتۋ ارقىلى قازاقستاندىق ٴسۇت شارۋاشىلىعىنىڭ باسەكەگە قابىلەتتىلىگىن ارتتىرۋ.
«كونگرەسستى ۇيىمداستىرۋعا قولداۋ كورسەتكەنىمىزگە قۋانىشتىمىز. كونگرەسس زاماناۋي تاجىريبەمەن الماسىپ، شيكى ٴسۇتتىڭ جەتكىزىلىمىن جانە ٴسۇت ونىمدەرىنىڭ ساپاسىن ارتتىرۋ ٴۇشىن وڭتايلى ورىن بولدى» - دەپ اتاپ ٴوتتى ەقدب اگروبيزنەس ٴبولىمىنىڭ باسشىسى مىندەتىن ۋاقىتشا اتقارۋشى ۆيكتوريا زينچۋك - «قازاقستاننىڭ كومپانيالارىنا قارجىلاندىرۋ، كەڭەستەر جانە نوۋ-حاۋ ۇسىنىپ، سالاداعى ونىمدىلىكتى ارتتىرۋعا جانە جەكە سەكتورعا ينۆەستيسيا كولەمىن ارتتىرۋعا كومەكتەسە الامىز».
سوڭعى ٴبىر جارىم جىلدىڭ ىشىندە ەقدب قازاقستاننىڭ اۋىل شارۋاشىلىعىنا 200 ملن ەۋرو ينۆەستيسيا جاسادى. ەقدب شاعىن جانە ورتا بيزنەستى قارجىلاندىرۋ جانە دامىتۋ باعدارلاماسىنىڭ اقتوبە، اقساي، الماتى، استانا، قاراعاندى، قوستاناي، شىمكەنت، وسكەمەن قالالارىندا ورنالاسقان كەڭسەلەرى اۋىلشارۋاشىلىق سالاسىنداعى شوب 2001 جىلدان بەرى قولداۋ كورسەتىپ كەلەدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1300 
0
2998
0