استانا: 
1955 
0
بيىل اۋىل شارۋاشىلىعى تەحنيكاسىن ليزينگكە جەڭىلدەتىلگەن نەسيە ارقىلى الۋعا 4 ملرد تەڭگە ٴبولىندى. بۇل تۋرالى «اگرارلىق نەسيە كورپوراسياسى» اق باسقارماسىنىڭ ٴتوراعاسى نارمۇحان سارىبايەۆ وكق-دا وتكەن ٴباسپاسوز كونفەرەنسياسىندا مالىمدەدى، دەپ حابارلايدى baq.kz اقپارات اگەنتتىگىنىڭ ٴتىلشىسى.
اۋىل شارۋاشىلىعى مينيسترلىگىنىڭ باعدارلاماسى اياسىندا شارۋالاردى تەحنيكامەن قامتاماسىز ەتۋ جانە وتاندىق اۋىل شارۋاشىلىعى جابدىقتارىن شىعارۋدى دامىتۋ قولعا الىندى. وسى ورايدا، اقمولا جانە قوستانايداعى كاسىپورىندار بازاسىندا از گاباريتتى اسپالى جانە تىركەمەلى تەحنيكانى شىعارۋ جوسپارلانعان.
«اگروتەحنيكا دەگەن نەسيەمەن بەرىلەتىن ٴونىمىمىز بار. بۇل نەسيە سەرىكتەستىكتەر مەن ليزينگتىك كومپانيالار ارقىلى جۇزەگە اسادى. تىكەلەي نەسيە بەرۋ كولەمىن ازايتىپ، باسقا ليزينگتىك كومپانيالار، قارجى ينستيتۋتتار ارقىلى نەسيەلەندىرۋدى ارتتىرامىز. 4 ملرد تەڭگە سوماسىنداعى جەڭىلدەتىلگەن نەسيە تولىعىمەن سەرىكتەستىكتەر، ليزينگتىك كومپانيالارمەن بىرگە جۇزەگە اسىرىلادى»، - دەپ مالىمدەدى نارمۇحان سارىبايەۆ.
بۇل جەڭىلدەتىلگەن نەسيە وتاندىق كومپانيالار وندىرگەن اسپالى جانە تىركەمەلى جابدىقتاردى قولداناتىن جانە شىعاراتىن كاسىپورىندارعا بەرىلەدى. ليزينگ شارتى بويىنشا نەسيە «قازاگرو» ۇبح قاراجاتى ەسەبىنەن جىلدىق مولشەرلەمەسى 5،5%-بەن 7-10 جىلعا دەيىن بەرىلەدى. باستى شارت - تەحنيكا قازاقستاندىق تاۋار ٴوندىرۋشىنىڭ ٴونىمى بولۋى ٴتيىس.
«اسپالى جانە تىركەمەلى تەحنيكا تۇرلەرىنە كەلەر بولساق ولارعا اۋىل شارۋاشىلىعى داقىلدارىن قۇرعاتۋ، مال شارۋاشىلىعىنا قاجەتتى قۇرالدار، ازىق دايىندايتىن تەحنيكا جانە توپىراقتى وڭدەيتىن تەحنيكالار كىرەدى. قىمبات تەحنيكاعا جاتپايدى. تەحنيكالاردى قولداناتىن شارۋالاردى عانا ەمەس، ولاردى شىعاراتىن زاۋىتتاردى دا قارجىلاندىرۋدامىز. بۇل دا ۇلتتىق قور قاراجاتىنا جىلدىق مولشەرلەمەسى 5،5 پايىزبەن 12 جىلعا بەرىلەدى»، - دەپ مالىمدەدى ن.سارىبايەۆ.
بۇل باعدارلاما تەحنيكالاردىڭ جاڭارۋىنا، شەتەلدەن كەلەتىن تەحنيكالاردىڭ ازايۋى مەن وتاندىق كاسىپورىندار ونىمدەرىن عانا قولدانۋعا الىپ كەلەدى. نەسيە بەرەتىن كومپانيالاردى «اگرارلىق نەسيە كورپوراسياسىنىڭ» رەسمي سايتىنان كورۋگە بولادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3000
0