استانا: 
قازاقستان رەسپۋبليكاسىنىڭ الەۋمەتتىك-دامۋىنداعى ەڭ ماڭىزدى باعىتتارىنىڭ ٴبىرى اۋىل شارۋاشىلى سالاسى. مەملەكەتتىك باعدارلامالار بەرەتىن ۇلكەن مۇمكىندىكتەر، بۇكىل الەمدىك ازىق-تۇلىك ونىمدەرىنە دەگەن سۇرانىستىڭ ٴوسۋى ەلىمىزدەگى اگروبيزنەستىڭ دامۋىنا ىقپال ەتىپ وتىر. وسىعان وراي بۇگىن استانادا «expogroup» حالىقارالىق كورمە كومپانياسىنىڭ ۇيىمداستىرۋىمەن اۋىلشارۋاشىلىق كورمەسى ٴوتتى، دەيدى baq.kz ٴتىلشىسى.
ٴۇش كۇنگە جالعاساتىن كورمە بيىل ٴ7-شى رەت ۇيىمداستىرىلىپ وتىر. الەمنىڭ 20-دان استام ەلىنەن 250 كومپانيا تەك قانا اۋىلشارۋاشىلىعىنا ارنالعان تاۋارلار، جەم-شوپ، تەحنيكامەن قاتار ٴسۇت ونىمدەرى، ٴداندى-داقىلداردى كورەرمەن نازارىنا ۇسىنادى.
«ٴبىزدىڭ ەلىمىز ٴۇشىن اۋىلشارۋاشىلىق سالاسى ەرەكشە بولىپ سانالادى. ول تەك قانا ەكونوميكالىق ەمەس، الەۋمەتتىك سالادا دا ەلىمىزدىڭ دامۋىندا ماڭىزدى ٴرول اتقارادى. سوندىقتان دا مۇنداي جوعارى دەڭگەيدەگى حالىقارالىق كورمەنىڭ ٴبىزدىڭ مەملەكەتىمىزدەگى الار ورىنى دا ەرەكشە بولماق. ٴبىز وسى كورمەگە قاتىسۋعا كەلگەن ٴاربىر كومپانيانى، ٴاربىر ازاماتتى قۇرمەتپەن قارسى الامىز» - دەدى كورمەنىڭ اشىلۋ سالتاناتىندا ٴسوز سويلەگەن اۋىلشارۋاشىلىعى ۆيسە-مينيسترى سەرىك ەگىزبايەۆ.
«kazagro/kazfarm-2016» كورمەسىنە وتاندىق كومپانيالارمەن قاتار شەتەلدىك تاۋار وندىرۋشىلەرى دە كوپتەپ قاتىسقان. سونىڭ ىشىندە گرۋزيا مەن فينليانديا بيىل العاش رەت قاتىسىپ وتىر. ال دانيا، ەگيپەت، يوردانيا، اقش، تاجىكستان، ۋكراينا، قاتارلى 20-دان استام مەملەكەت بۇدان بۇرىن دا بۇل كورمەنىڭ كوركىن قىزدىرعان.
«ٴبىزدىڭ كومپانيا بۇل كورمەگە ٴبىرىنشى رەت قاتىسىپ وتىر. اۋىلشارۋاشىلىعى سالاسىندا جەم-شوپ دايىنداۋمەن اينالىسامىز. ٴىرى مالداردان باستاپ ٴۇي جاعدايىندا وسىرىلەتىن بالىقتارعا دەيىن ازىق-تۇلىك دايارلايمىز. كورمەگە كەلۋدەگى باستى ماقساتىمىز – وزگە ەلدەردەگى ارىپتەس كومپانيالارمەن قارىم-قاتىناس جاساۋ جانە قازاقستانمەن بىرلەسە وتىرىپ ٴوزىمىزدىڭ ونىمدەرىمىزدى ەكىجاقتى ساۋداعا سالۋ. تاعى ٴبىر ماقساتىمىز قازاقستاننان دا تاۋار ساتىپ الۋ. استانادا دا العاش رەت بولىپ وتىرمىز. وتە تاماشا قالا ەكەن» - دەيدى تۇركيالىق «egevizyon» كومپانياسىنىڭ باس ۇيلەستىرۋشىسى، زووتەحنيك رىزا دونمەز.
استانادا باستالعان كورمەگە ەلىمىزدىڭ دە بىرنەشە كومپانيالارى مەن رەسمي ديللەرلەرى قاتىسۋدا. «قازاقستاندا جاسالعان» «حالىق ماركاسى» «التىن ساپا» قاتارلى برەندتىك ماركا يەگەرلەرى دە وسى كورمەگە قاتىسىپ، ٴوز ونىمدەرىن جۇرتشىلىققا ۇسىنۋدا.
«شقو، وسكەمەن قالاسىنان كەلىپ وتىرمىز. نەگىزگى مىندەتىمىز رەسمي ديللەرلىكپەن اينالىسۋ. بەلارۋسيالىق، يتالياندىق، رەسەيلىك كومپانيالارمەن بىرلەسىپ اگروتەحنيكالار ساتامىز. كورمەگە العاشقى جىلدان بەرى قاتىسىپ كەلەمىز. بيىلعى كورمەنىڭ ەرەكشەلىگى قاتىسۋشىلار دا، كەلۋشىلەر دە وتە كوپ. بۇل جولعى كورمەگە اكەلگەن تەحنيكالارىمىزدىڭ كوبى قىسقى جەم-شوپ دايىنداۋعا ارنالعان» - دەيدى «استانااگروپارتنەر» كومپانياسىنىڭ تەحنيكالىق ديرەكتورى ەرلان ەرمەك ۇلى.
14 000 شارشى مەتر اۋماقتى الىپ جاتقان كورمەدە اگروشارۋاشىلىققا ارنالعان دۇنيەنىڭ بارلىعى دا بار. ٴۇش كۇنگە جالعاساتىن كورمەدە كوپتەگەن كەلىسىمشارتتار جاسالىپ، حالىقارالىق دەڭگەيدەگى ساۋدا-ساتتىق بولادى دەپ كۇتىلۋدە.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1961 
0
3000
0