2016 جىلى مەملەكەت باسشىسىنىڭ تاپسىرماسىنا سايكەس جەر سالاسىندا تۋىنداعان ماسەلەلەردى زەردەلەۋ ٴۇشىن ارنايى كوميسسيا جۇمىس ىستەدى. كوميسسيا مۇشەلەرىمەن اۋىل شارۋاشىلىق جەرلەرىن قازاقستان رەسپۋبليكاسىنىڭ جەكە جانە زاڭدى تۇلعالارىنا جالعا بەرۋ ينستيتۋتىن ساقتاپ، ونى دامىتۋعا جانە جەر كودەكسىنە ەنگىزىلگەن ٴموراتورييدىڭ مەرزىمىن 5 جىلعا ۇزارتۋ تۋرالى ۇسىنىس بەرىلگەن بولاتىن. بۇگىن وسى ماسەلەگە قاتىستى جەر كودەكسىنە ەنگىزىلگەن جاڭا وزگەرىستەرگە بايلانىستى ٴباسپاسوز كونفەرەنسيا ٴوتتى، دەپ حابارلايدى baq.kz اقپارات اگەنتتىگى.
قىزۋ قوعامدىق پىكىر تۋعىزعان ماسەلەلەر بويىنشا قولدانىستاعى موراتوريي مەرزىمى 2021 جىلدىڭ 31 جەلتوقسانىنا دەيىن ۇزارتىلىپ اۋىلشارۋاشىلىعى جەرلەرىن قازاقستاندىقتارعا جەكە مەنشىككە جانە شەتەلدىكتەرگە جالعا بەرۋدى توقتاتا تۇراتىن وزگەرىستەر ەنگىزىلدى.
«موراتوريي كەزىڭدە اۋىل شارۋاشىلىعى جەرلەرىنىڭ ساپالى جاعدايى، ولاردىڭ پايدالانىلۋى، مەنشىك يەلەلەرى مەن جەر پايدالانۋشىلار تۋرالى مالىمەتتەر بازاسىن قۇرۋعا باعىتتالعان رەۆيزيا جانە توپىراقتىق، گەوبوتانيكالىق زەرتتەۋ جۇمىستارىن جۇرگىزۋ كوزدەلىپ وتىر. ولاردىڭ نەگىزىندە توپىراقتىق جانە گەوبوتانيكالىق ەلەكتروندىق كارتالار قۇرۋ، ەسەپتىك كۆارتالداردىڭ ەلەكتروندى جەر-كاداسترلىق كارتالارىن جاساۋ قامتاماسىز ەتىلەدى. اتالعان جۇمىستاردى جۇرگىزۋ ٴۇشىن 32،8 ملرد تەڭگە قاراجات قاراستىرىلىپ وتىر» - دەدى قر اشم جەر رەسۋرستارىن باسقارۋ كوميتەتى ٴتوراعاسىنىڭ ورىنباسارى ەركەبۇلان داۋىلبايەۆ.
سونىمەن قاتار ول جەر رەفورماسى جونىندەگى كوميسسيا جۇمىسىنىڭ قورىتىندىسى بويىنشا قابىلدانعان ۇسىنىستارعا توقتالدى.
«اۋىل شارۋاشىلىعى جەرلەرىن قازاقستاندىقتارعا جالعا بەرۋ ينستيتۋتىن ساقتاۋ جانە ونى جەتىلدىرۋ; جالعا بەرىلەتىن اۋىل شارۋاشىلىعى جەرلەرىنىڭ شەكتى مولشەرىن بەلگىلەۋ; شەكارا ماڭىنان اۋىل شارۋاشىلىعى جەرلەرىن بەرۋگە قويىلاتىن تالاپتاردى كۇشەيتۋ; حالىققا قاجەتتى جايىلىمدىق جەرلەردىڭ كولەمىن انىقتاۋ; جەكە تۇرعىن ٴۇي قۇرىلىسى ٴۇشىن قاجەتتى جەر ۋچاسكەلەرىن مەملەكەتتىك مۇقتاجدىققا جاتقىزۋ قاراتلى 5 ٴتۇرلى ۇسىنىس قابىلداندى. بۇگىنگى كۇنگە، پارلامەنت ماجىلىسىندە قارالىپ وتىرعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى وسى ماسەلەلەردى زاڭنامالىق تۇرعىدان بەكىتۋدى قاراستىرادى» - دەدى اۋىلشارۋاشىلىق مينيسترلىگىنىڭ وكىلى.
سونداي-اق ەركەبۇلان داۋىلبايەۆتىڭ ايتۋىنا قاراعاندا زاڭ جوباسى اۋىل شارۋاشىلىعى جەرلەرىن قازاقستاندىقتارعا جالعا بەرۋ ينستيتۋتىن ساقتاي وتىرىپ، جەرلەردى كونكۋرستىق نەگىزدە بەرۋدىڭ جەكە ٴتارتىبىن بەلگىلەۋدى كوزدەيدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
استانا: 
1665 
0
ەرجان جاۋباي 
3000
0 
