الماتى وبلىسىندا ەگىن ەگۋ ناۋقانى اياقتالدى

كوكتەمگى ەگىس ناۋقانى الماتى وبلىسىندا تولىعىمەن اياقتالدى. وبلىستىق اۋىل شارۋاشىلىعى باسقارماسىنىڭ مالىمەتىنە سۇيەنسەك، بيىلعى جىلى كوكتەمگى ەگىستىك القابىنىڭ كولەمى 610،2 مىڭ گەكتاردى قۇرادى. سۋارۋ جۇيەلەرىن قالپىنا كەلتىرۋ ەسەبىنەن بۇل كورسەتكىش وتكەن جىلمەن سالىستىرعاندا 19،1 مىڭ گەكتارعا ارتتى، دەپ حابارلايدى baq.kz الماتى وبلىسى اكىمىنىڭ ٴباسپاسوز قىزمەتىنە سىلتەمە جاساپ.

اتاپ ايتقاندا، 231،4 مىڭ گەكتارعا ٴداندى داقىلدار، 164،6 مىڭ گەكتارعا مايلى داقىلدار ەگىلگەن. سونىمەن قاتار وبلىستىڭ باسىمدىق بەرەتىن قانت قىزىلشاسى مەن جۇگەرىگە بيىل دا ەرەكشە ٴمان بەرىلدى. تۇقىم سەبۋدەن ٴونىم جيناۋعا دەيىنگى شارۋالاردىڭ الدىنان شىعاتىن ماسەلەلەرىنىڭ بارلىعىنا مەملەكەت تاراپىنان قولداۋ كورسەتىلىپ كەلەدى.

ساپالى تۇقىممەن قامتاماسىز ەتۋ، سۋبسيديا ٴبولۋ، سەرۆيستىك-دايىنداۋ ورتالىقتارىن قۇرۋ ارقىلى قاجەتتى تەحنيكامەن قامتۋ، جينالعان ٴونىمدى ٴتيىمدى باعادا وتكىزۋ ٴىسىنىڭ بارلىعى دا جولعا قويىلعان. سونىڭ ناتيجەسىندە بىلتىرعى جىلى وڭىردە 6، 4 مىڭ گەكتارعا قانت قىزىلشاسى سەبىلسە، بيىلعى جىلى ونىڭ كولەمى 9 مىڭ گەكتارعا جەتكىزىلىپ وتىر.

ال داندىك جۇگەرىنىڭ القابى 2016 جىلى 71،1 مىڭ گەكتار بولسا، بيىلعى جىلى 78،6 مىڭ گەكتاردى قۇرادى. بۇدان بولەك كوكونىس، كارتوپ، كۇرىش تە سەبىلىپ بولدى. كوكتەمگى ەگىننىڭ جوسپارلانعان اۋقىمى تولىق ورىندالدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!