اقتوبە وبلىسىندا ٴداستۇرلى ەمەس اۋىل شارۋاشىلىعى ونىمدەرى وسىرىلە باستادى

اقتوبە وبلىسىنىڭ اكىمى ويىل اۋدانىنا باردى. ٴوڭىر باسشىسى اتىراۋ جانە باتىس قازاقستان وبلىستارىمەن شەكتەسەتىن قاروي جانە ساربيە اۋىلدىق وكرۋگتەرىندە بولىپ، الەۋمەتتىك نىسانداردى ارالادى، تۇرعىندارمەن كەزدەسىپ، ەگىن ورۋ ناۋقانى بارىسىمەن تانىستى، دەپ حابارلايدى baq.kz اقتوبە وبلىسى اكىمدىگىنىڭ ٴباسپاسوز قىزمەتىنە سىلتەمە جاساپ.

قاروي اۋىلدىق وكرۋگىنىڭ اۋماعىندا ورنالاسقان «ادىلەت» شارۋا قوجالىعىندا بىرنەشە جىلعى قۇرعاقشىلىقتان كەيىن بيىل ەگىن بىتىك شىققان. كوكتەمدە 150 گەكتار ارپا مەن 50 گەكتار تارى ەگىلگەن.

- جاز جاڭبىرلى بولعاندىقتان، سونىمەن بىرگە جەردى تەحنولوگيالاردى ساقتاي وتىرىپ، جىرتىلۋىنا بايلانىستى ٴار گەكتاردان 10 توننا ارپا، 12 سەنتنەر تارىدان الىنعان. ەندى ەگىن القاپتارىن ۇلعايتۋ كوزدەلىپ وتىر، - دەدى شارۋا قوجالىعىنىڭ جەتەكشىسى ساكەن زايمولدين.

وبلىس اكىمى بەردىبەك ساپاربايەۆ القاپتارداعى جۇمىستارعا كوڭىلى تولاتىنىن جەتكىزدى.

ٴوڭىر باسشىسى ساربيە اۋىلدىق وكرۋگىندە ورنالاسقان «جاقىپ» شارۋا قوجالىعىندا دا بولدى. مۇندا 100 گەكتار تارى، 14 گەكتار باقشا ونىمدەرى ەگىلگەن.

قاروي جانە ساربيە اۋىلدارىنداعى وتباسىلىق-دارىگەرلىك قوسىنداردى، كلۋبتاردى، بالاباقشالار مەن مەكتەپتەردى ارالاپ شىققان بەردىبەك ساپاربايەۆ ولاردىڭ ماتەريالدىق-تەحيكالىق بازاسىنا، قىس مەزگىلىنە وتىنمەن قامتاماسىز ەتىلۋىنە، ماماندارمەن قامتىلۋىنا ەرەكشە نازار اۋداردى.

جەرگىلىكتى تۇرعىندارمەن كەزدەسۋ بارىسىندا گازبەن جانە اۋىز سۋمەن قامتاماسىز ەتۋ جونىندە اڭگىمە ٴوربىدى.

- جول جوندەۋ، سۋ جانە گازبەن قامتاماسىز ەتۋ ماسەلەلەرى ۋاقىتىمەن شەشىمىن تابادى. باستىسى – بىرلىگىمىزدى ساقتاپ قالۋ ٴۇشىن بارلىق جاعدايدى جاساۋ كەرەك. قول جەتكىزگەن جەتىستىكتەرىمىزدٴى ەسەلەۋ قاجەت. تەك بىرلىك پەن كەلىسىم جارقىن بولاشاعىمىزدىڭ كەپىلى بولا الادى، - دەدى وبلىس باسشىسى.

سودان كەيىن بەردىبەك ساپاربايەۆ 140 ورىنعا ەسەپتەلگەن «بالدىرعان» بالاباقشاسىندا «تۋعان جەرگە تاعزىم» اكسياسى اياسىندا جۇرگىزىلىپ جاتقان جوندەۋ جۇمىستارىمەن تانىستى. وندا سپورت جانە ويىن الاڭدارى سالىندى.

ٴوڭىر باسشىسى ٴداستۇرلى ەمەس اۋىل شارۋاشىلىعى وسىمدىكتەرىن وسىرەتىن بىرنەشە شارۋا قوجالىعىندا بولدى.

«ويىل-قۇلپىناي» جشس ديرەكتورى راسۋل ەرسەيىتوۆ 1،5 گەكتار القاپقا قۇلپىناي ەككەن. قوسىمشا بايالدى، ٴتاتتى بۇرىش، قىزىلشا، مويىل، ۇيەڭكى ەگىپتى. شارۋا الداعى جىلى كوكونىس ساقتاۋ قويماسى، جىلىجاي، شىرىن وندىرەتىن سەح سالۋدى، الما باعىن ٴوسىرۋدى جوسپارلاپ وتىرعانىن جەتكىزدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!