BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جۇكتىلىك پەن بوسانۋعا ارنالعان العاشقى قازاق تىلىندەگى كىتاپ جارىققا شىقتى

استانا. 6 اقپان. baq.kz – بۇگىن ەگىز قىزدىڭ اناسى جانار كوبەكبايدىڭ جۇكتىلىك پەن بوسانۋعا ارنالعان «انا باقىتى نەمەسە جۇكتى ايەلگە ارنالعان كۇندەلىك» اتتى كىتابىنىڭ سالتاناتتى تۇساۋكەسەر ٴراسىمى ٴوتتى. 

اۆتور، ٴارى جۋرناليست بۇل كىتاپ بولاشاق انانىڭ اينىماس سەرىگى بولاتىنىنا سەنىمدى. وندا ٴاربىر جۇكتى ايەل ٴبىلۋى ٴتيىس اقپاراتتار جازىلعان. ماسەلەن، جۇكتىلىكتىڭ كەزەڭدەرى مەن انا قۇرساعىنداعى شارانانىڭ دامۋى تۋرالى، بوسانۋ مەن قازاق تانىمىنداعى انا مەن بالاعا قاتىستى ۇعىمدار مەن ەگىزدەردىڭ تاربيەسى تۋرالى مالىمەتتى تولىقتاي وسى كىتاپتان تابۋعا بولادى.
جانار جۇكتى كەزىندە جۇكتىلىك پەن بوسانۋ تۋرالى مەملەكەتتىك تىلدە جازىلعان ەشبىر ادەبيەت تاپپاعانىن ايتادى.
«ٴوزىم اياعىم اۋىر كەزدە ٴاربىر اپتانى تولىق سيپاتتاپ بەرەتىن، بالانىڭ دامۋى مەن بولاشاق انا كۇتىمى تۋرالى اقپاراتتاردى عالامتوردان دا كىتاپ بەتتەرىنەن دە ىزدەي باستادىم. ٴبىراق، وكىنىشكە قاراي ونىڭ بارلىعى ورىس تىلىندە بولدى. سول كەزدە قولىما قالام ۇستاعان جۋرناليست رەتىندە انا تىلىندە جۇكتىلىك جايىندا كىتاپ بىلاي تۇرسىن، قاراپايىم اقپاراتتىڭ بولماۋى مەنى قىنجىلتتى. ولقىلىقتىڭ ورنىن باسۋعا تىرىسقىم كەلدى. باسىمنان وتكەرگەندەردى العاشىندا كۇندەلىگىمە جازىپ ٴجۇردىم. ونان سوڭ كىتاپ رەتىندە قالىڭ وقىرمانعا جازىپ شىعارۋدى ۇيعاردىم» دەدى جانار كوبەكباي.
كىتاپتىڭ شىعۋىنا ەگىز قىزدىڭ اناسىنىڭ بويىنا نارەستە بىتكەن ساتتەن باستاپ جۇرگىزگەن كۇندەلىگى نەگىز بولىپتى. 174 بەتتەن تۇراتىن كىتاپتىڭ ەرەكشەلىگى دە وسىندا: «انا باقىتى نەمەسە جۇكتى ايەلگە ارنالعان كۇندەلىك» كىتابىندا بولاشاق انالارعا ارنالعان «جەكە كۇندەلىك» دەگەن ايدار دا بار. مۇندا كەلىنشەكتەر جۇكتىلىك كەزىندە وزىندەگى ەرەكشەلىكتى كىتاپقا جازۋىنا مۇمكىندىك جاسالعان.
ەكى اپتا بۇرىن قولىنا تيگەن كىتاپتى جاناردىڭ قۇربىسى دانا ٴسابي دە پايدالانا باستاپتى. العاشقى جازبالارىن دا تۇساۋ كەسەرگە جينالعان قاۋىمعا كورسەتتى.
«تۇڭعىشىم، ايعانىمعا اياعىم اۋىر كەزدە مەن دە جانار سەكىلدى ٴوزىمدى قىزىقتىرعان اقپاراتتاردى ىزدەپ، بارلىق كىتاپتاردى، عالامتوردى شارلادىم. ٴبىراق، قازاق تىلىندە راسىندا دا مۇنداي كىتاپ جوق بولىپ شىقتى. ٴقازىر ەكىنشى رەت جۇكتىمىن، كورىپ وتىرعاندارىڭىزداي. جانار جازعان كىتاپتى الدىم. كۇندەلىك رەتىندە وزىمە قىمبات شاقتاردى ٴتۇرتىپ، ٴوز سەزىمىمدى جازىپ تا ۇلگەردىم» دەدى دانا ٴسابي.
نەگىزى، «انا باقىتى نەمەسە جۇكتى ايەلگە ارنالعان كۇندەلىك» كىتابى ٴتورت بولىمنەن تۇرادى.
«مەن بولاشاق انامىن!» بولىمىندە ٴسابيدىڭ قۇرساقتاعى دامۋى مەن وسى اپتالاردا انا بويىندا بولاتىن وزگەرىستەر باياندالعان.
ەكىنشى، «بوسانۋدىڭ بابىن ٴبىل» بولىمىندە بوسانار ۋاقىتتا دۇرىس تىنىس الۋدىڭ ماڭىزى مەن جولدارى، اۋرۋدى باسەڭدەتۋ، جاتتىعۋلار ۇسىنىلعان.
كىتاپتىڭ «ەرەكشە جۇكتىلىك نەمەسە مەنىڭ كۇندەلىگىمنەن...» ٴبولىمى ەگىزدەرگە ارنالعان. قوس بالانىڭ اناسى اتاناتىنىن بىلگەن بولاشاق انالاردىڭ ارەكەتى، بالالاردى دۇنيەگە اكەلگەن سوڭ، ەكەۋىنە بىردەي كۇتىمى جايلى جازىلعان.
ال سوڭعى ٴبولىم انا مەن بالاعا قاتىستى ىرىمدار، ەتنوگرافيالىق تۇسىنىكتەرگە ارنالىپتى.
كىتاپ جالاڭ انا تاجىريبەسىنە عانا سۇيەمەلدەنبەگەن. باسىلىمعا رەپرۋدۋكتولوگ، تاجىريبەلى دارىگەر الماز يبراگيموۆ رەزەنزيا جازىپتى.
كىتاپتى جانار كوبەكباي ٴبىر جارىم جىلدا جازىپ شىققان. زەرە مەن اديا ەسىمدى قىزدارى ٴقازىر ٴبىر جاس ٴۇش ايدان اسىپتى. ال كۇندەلىك جازىپ، ونى كىتاپقا اينالدىرعان انانىڭ ەندىگى ماقساتى - وسى كىتاپتى اۋىل ايماقتارداعى قىز كەلىنشەكتەرگە جەتكىزۋ. ول ٴۇشىن جيناقتىڭ ٴموبيلدى نۇسقاسى دا دايارلانىپ جاتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي