BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جانات جايلىباي: ٴوز بەتىمشە اشقان بولدىم تۇنەكتى

 استانا. 27 مامىر. baq.kz - جاس اقىن جانات جايلىباي 1994 جىلى 13 -ساۋىردە قاراعاندى وبلىسى، جاڭارقا اۋدانىندا دۇنيەگە كەلگەن. جەزقازعان قالاسىنىڭ №1 ورتا مەكتەبىن ۇزدىك ٴتامامداعان. رەسپۋبليكالىق «ماحامبەت وقۋلارى» مەن «تەك ەل دەگەن ٴسوز ٴۇشىن» اتتى ماعجان جۇمابايەۆتىڭ 120 جىلدىعىنا ارنالعان پروزايكتەر بايقاۋىنىڭ جەڭىمپازى. ەسىمى قازاقستان رەسپۋبليكاسىنىڭ «بولاشاق» ەنسيكلوپەدياسىنا ەنگەن. قازىرگى ۋاقىتتا قازاق ۇلتتىق ونەر ۋنيۆەرسيتەتىنىڭ كينو جانە تەلەدراماتۋرگيا ماماندىعىندا وقيدى. ۋنيۆەرسيتەت قابىرعاسىندا تۇسىرگەن العاشقى قىسقامەتراجدى ٴفيلمى حالىقارالىق «شاكەن جۇلدىزدارى» اتتى فەستيۆالىندە ۇزدىك 20 توپتامانىڭ قاتارىنا ەندى.

 قاسىمنان عاسىرعا


سور بەشەنەڭە جازىلعان كۇننىڭ سىزدارى،
سەنى ىزدەگەندەي ٴلايلىم جۇرەكتىڭ قۇزدارى.
ماڭدايىمدى يىسكەپ كەتكەندەي بولدى بۇگىندە،
قارقارالىدان ەسكەن سامالدىڭ ىزعارى.

اقىن ۇرپاعى،قاسىم ۇرپاعى كۇلىمدە.
جىر جازسام ساعان كەتپەيدى مەنىڭ تۇگىم دە.
ق ۇلىن جۇرەگىم، قازىرگى تاڭدا دۇرسىلدەپ.
قاسىم دەپ سوقتى، قاسىم دەپ سوقتى بۇگىندە.

ٴومىر بوپ ماعان،ولەڭ بوپ ماعان جەل ەسى،
ٴجۇزىپ كەلەدى،الاشتىڭ سولعىن كەمەسى.
جىردىڭ الىبى توبەدەن قارا سەن ماعان،
ۇرپاعىڭمىن مەن، بالا قاسىمنىڭ تورەسى.

جىرىڭدى قاسىم،كوكتەم نۇرىنداي الدىرعان،
دىبىسىڭ تىنباي ەستىلىپ جاتتى سان قىردان.
مارعاسقا ۇلى قازاقتىڭ اعا سەن ەدىڭ،
تاسقىنىڭ تۋلاپ اعاتاي قاسىم جاردى ۇرعان.

ۇرپاعىڭ وتەر جىرىڭدى ۇقتاپ ٴان قىلىپ،
بولاشاعىڭا قالعانداي ٴسوزىڭ ماڭگى ٴۇمىت.
امانجول قاسىم ٴبىر اۋناپ تۇسكەن ششىعارسىڭ.
ۇلىقتاۋ سەنى ٴبىز ٴۇشىن اعا زاڭدىلىق.

 

 

سەزىمگە ناز...


ساعىنا بەردىم.
اياڭ جاي باسىپ تاعدىردىڭ شامىنا كەلدىم.
تولىقسىعانداي، مۇڭدانا ويىمدى شالىپ،
باسىمدى ٴيدىم، امالسىز تاعىنا جەردىڭ.

ەركەلەسەڭ دە.
ساياز باقىتقا جەلكىلدەپ ەرتە كەلسەڭ دە.
شوق بولىپ تۇرعان جۇرەككە داۋا بەرىڭدەر،
بەتكەيدەن ٴۇرىپ ٴسوزىمدى ورتەمە سەن دە.

سولقىلداعانداي.
مەڭىرەۋدەگى اساۋ ٴتۇس جورتىلماعانداي.
اق زەر كوڭىلىم، شابىتتا وكسي بەرەدى،
ماحاببات ٴنارىن ىشسەم دە قورتىلماعانداي.

جىبىگەن ەدى.
لەبىزدەرىم دە سىرىڭدى ۇعىپ كۇڭىرەنەدى.
كۇلتەڭە تىققان جاسىرىن سەزىمدى جەتىم،
جاۋقازىن جانىم، جىرىمنىڭ تۇبىنە كەلدى.

ايالادىڭ با؟
تورىعىپ، تولقىپ جانىمدى سايالادىڭ با؟
تاكاپپار سەزىم كورەرسىڭ، ٴالى دە تالاي،
ارمان قۋامىن ارىمنىڭ ساياباعىندا.

 

 

سۋىق

 

سۋىق قالا، سۋىق دالا، سۋىق قار،
بالاڭ سەزىم ٴور كوڭىلىن جۋىقتار.
ۇمىتتەنە بەرەمىن مەن دارمەنسىز،
قانشا جەردەن سوقساداعى سۋىقتار.

سۋىق جۇرەك، سۋىق كوڭىل، سۋىق ٴتۇر،
ارىستارعا قوعام دەگەن سۋىپ تۇر.
جۇرەگىمدە قالا بەرمەك سوندا دا،
ايتىلماعان ەشبىر جانعا سۋىق سىر.

سۋىق سەزىم، سۋىق كوزىڭ، سۋىق قان،
كوڭىلىم ناز، اۋماي قالعان ۋىقتان.
بوس سوزدەر مەن ارسىز ويلار كەنەتتەن،
بايقاۋسىزدا كوڭىلىمدى سۋىتقان.

ٴوز بەتىمشە اشقان بولدىم تۇنەكتى،
قايران جۇرەك، سەزىمىمە جىر ەكتى.
اياڭدارشى، و جاماعات ونى دا،
بار سۋىقتان توڭىپ قالعان جۇرەكتى.

 

 


ات ۇستىندەگى قازاق

ماق ۇلىقتار ارىن توككەن سان مايدا،
ٴتۇر جاسايدى مادەنيەتتى ادام بوپ.
ٴتوس تارتپاسى بوساپ كەتكەن جاعدايدا،
شاپ ايىلعا سەنىپ جۇرگەن جامان كوپ.

تاقىمدى قىس، قانجىعاڭدا تازا ٴدىن،
ٴدىنسىزدىر بار، جۇرەكتەرى تاس قامال.
توماعاڭدى بەرىك ۇستا قازاعىم،
شىلبىرىڭدى سۇيرەتپەسىن باسقالار.

باستا جۇگەن بوپ جۇرگەندەر بار بىلەم،
ٴدىلدى باسقا جەرگە شاشىپ تاستاشى.
مادەنيەتىڭ جوعالماسىن الدىمەن،
قۇيىسقاندا قالا بەرسىن باسقاسى.

مادەنيەتىم كەم ٴتۇسىپ ەك ٴبىز كىمنەن،
ٴبورى ەمەن، كوك ٴتاڭىرىڭ اسپاندا.
ايبىندى بول، ايىرىلماشى تىزگىننەن،
قارا وزەككە قۇلاپ بارا جاتساڭدا.

 

وركەنيەتىم، ٴور ٴۇردىسىم ەسەن سوق،
دوڭىز الدى، كوكپار العان سىندى بوپ.
جۋاس تايعا وتىرىپ الىپ ەسەرسوق،
اۋىزدىقپەن الىساتىن جىندى كوپ.

قۋانبا ەرتە، مادەنيەتىڭ ٴپىستى مە؟
ٴار ىسىڭە سابىرلى بول، كوكتە سىن.
قايران مەنىڭ قوي مىنەزدىم، ۇستىڭە،
ايداھار كەپ جۇمىرتقالاپ كەتپەسىن.

 

 

ەلەڭدەمە وتىنەم

 

ەندى سەنى ساعىنبايمىن،
جالىنبايمىن، كەتسەڭ دە،
سەزىمگە دە باعىنبايمىن،
قارسى قاراپ وتسەڭ دە.

مەيلى باردىڭ سول ماڭعا،
كەلمەيمىن دەپ كەتىپ ەم.
مەن جۇرەتىن جولدارعا،
ەلەڭدەمە وتىنەم.

ساعىندىم سول ساعىمدى،
ايمالاعان سامالى.
ەركە قۇشىپ جانىمدى،
ەركەلەتىپ بارادى.

ماقپال ٴتۇننىڭ الدىندا،
سەزىمىڭدى سەزبەدىم،
ساعىم قۇشىپ قالدىڭ با؟
مەنىڭ عاشىق كەزدەرىم.

 

 

 

 

 

 

 

 

 

 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي