BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تۇركىستاندا «ايكول ماناس» جىرى قازاق تىلىندە جارىققا شىقتى

استانا. 5 مامىر. baq.kz - تۇركى جۇرتىنىڭ رۋحاني ورداسىنا اينالعان تۇركىستان جەرىندە تاعى ٴبىر رۋحاني قۇندىلىقتىڭ تۇساۋى كەسىلدى. مۇندا قىرعىزدىڭ ايگىلى «ماناس» جىرىنىڭ «ايكول ماناس» اتىمەن قايتا جىرلانعان ون تومدىعى قازاق تىلىندە جارىققا شىقتى. اتالمىش تۋىندى شاھارداعى «تۇركى حالىقتار كىتاپحاناسىندا» تۇساۋى كەسىلدى. 

باسقوسۋعا بەلگىلى عالىمدار، ستۋدەنتتەر، قالالىق كىتاپحانا قىزمەتكەرلەرى مەن ارنايى قىرعىز ەلىنەن كەلگەن مادەنيەت قايراتكەرلەرى قاتىستى. ون تومدىق «ايكول ماناس» جىرىن ماناستى العاش جىرلاۋشى ايگىلى جايساڭ ٴۇموت ۇلىنىڭ نەگىزىندە ايان ارقىلى ٴبۇبى ماريام مۇساقىزى جىرلاعان. بۇل كىتاپتى قازاق تىلىنە اۋدارعان - نازاربەك بايجىگىتوۆ.

-تۇركىستانعا كەلىپ، وزگەشە ٴبىر رۋحتىڭ بار ەكەنىن سەزىنگەندەيمىن،- دەيدى قىرعىز ەلىنىڭ بەلگىلى كينورەجيسسەرى ەرنەست ابدۋجاپپاروۆ. — ماناس جىرى ايتىلعاندا ونى العاش قاعازعا تۇسىرگەن قازاقتىڭ كورنەكتى عالىمى شوقان ٴۋاليحانوۆتى جانە جىردىڭ جولىن اشقان مۇحتار اۋەزوۆتەي دارا تۇلعانى ايتپاي كەتۋگە بولمايدى. «ايكول ماناس» داستانى ماناسشىلار ايتىپ كەلگەن كوپتەگەن نۇسقالارى قامتىلماعان تىڭ دەرەكتەردى قۇرادى. ٴبۇبى ماريام مۇساقىزىنىڭ جازباشا نۇسقاسىندا بۇرىن بۇرمالانىپ كەلگەن مالىمەتتەر تۇزەتىلىپ، اتتارى ۇمىتىلعان باتىرلار ۇرپاقتارمەن قايتا قاۋىشتى.

- «ماناس» جىرىن ٴتۇبى ٴبىر تۇركى ەلدەرىنىڭ ورتاق مۇراسى دەپ ەسەپتەيمىز. سوندىقتان بۇل كىتاپ باۋىرلاس قازاق ەلىنىڭ، قازاق وقىرماندارىنىڭ قىزىعۋشىلىعىن تۋدىرادى، - دەدى قىرعىز جازۋشىسى ٴجۇمادىل قادىروۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي