BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«ماڭگىلىك ەل – ۇلت مۇراتى» اتتى رەسپۋبليكالىق جىر ٴمۇشايراسى مارەگە جەتتى

ەلوردادا استانا قالاسى اكىمدىگى قالا كۇنىنىڭ قۇرمەتىنە وسىمەن ٴتورتىنشى رەت وتكىزىپ وتىرعان ٴداستۇرلى ٴمۇشايرا ٴوز مارەسىنە جەتتى.
 

بيىلعى «ماڭگىلىك ەل – ۇلت مۇراتى» ايدارىمەن جاريالانعان جىر بايگەسىنە ەلىمىزدىڭ تۇكپىر-تۇكپىرىنەن، قىتاي حالىق رەسپۋبليكاسىنان، مونعوليادان 60-تان استام اقىننىڭ شىعارمالارى كەلىپ تۇسكەن ەدى. ماڭگىلىك ەل تاقىرىبى – وتانشىلدىق، ۇلتتىق رۋحتىڭ مەرەيىن اسىراتىن، ەلدىككە، بىرلىككە ۇندەيتىن، جاس ۇرپاقتىڭ جىگەرىن جانىپ، نامىسىن قايرايتىن، تۋعان ەل مەن تۋعان تىلگە دەگەن سۇيىسپەنشىلىگىن وياتاتىن، قيىننان قيىستىرىپ جىرلاي بىلگەن اقىنعا تولعاعان سايىن كوكجيەگى كەڭەيە تۇسەتىن تۇعىرلى دا عۇمىرلى تاقىرىپ. بايگەدە باعىن سىناعان اقىنداردىڭ بەرىلگەن تاقىرىپتى تەرەڭنەن قوزعاپ، كەڭىنەن قامتىپ جىرلاۋعا بارىن سالعاندىعى بايقالادى. اسىرەسە، بيىلعى ٴمۇشايرادا ەلباسىنىڭ «ماڭگىلىك ەل» ۇلتتىق يدەياسىنا بەلسەنە ٴۇن قوسقان جاڭا ەسىم – جاس اقىندار قاتارىنىڭ كوپ بولۋى قۋانتادى. مىسالى، سەمەيلىك جاس تالانت ارمان شەريزاتوۆ «سايىپقىران» دەگەن ولەڭىندە تاۋەلسىزدىك تاعدىرىن:
تاڭىرگە ٴتان رۋحىممەن اسپاندىق،
تاريحىمدى تاسقا جازعام داستان عىپ.
ٴقازىر ٴبىزدى جەر ۇستىندە تەربەپ تۇر،
قازتۋعان مەن اسان كۇتكەن بوستاندىق!
بودان بولعان ٴومىردىڭ قاي بار ٴمانى،
قۇسا قىسقان قۇس سەكىلدى تورداعى؟! 
قىران بولىپ قالىقتادى اسپانعا،
ازاتتىقتى كۇتكەن ەلدىڭ ارمانى، -
دەپ تولعاسا; «سەندەي بولسىن بارلىق وتان، بار انا» اتتى ولەڭىمەن قاتىسقان الماتىلىق جاڭا ەسىم اقسۇيرىك ٴىزمۇقانوۆا:
مەيىرىمىڭ مۇحيتتان دا مول بىلسەم،
جىلاعانعا جىلى قۇشاق بولدىڭ سەن.
تۋعان وتان، شۋاق تۇنعان شاراڭا،
سەندەي بولسىن بارلىق وتان، بار انا!
قاسيەتتى قازاقستان - نۇرلى ەلىم،
قۇشاعىڭدا شەشەك اتتىم، بۇرلەدىم!-
دەپ، جاستىعىنا قاراماستان پەرزەنتتىك ماحابباتپەن بيىكتەن ٴۇن قاتىپ، تەبىرەنە جىرلايدى. جاس اقىنداردىڭ ٴسوز ونەرىن ەركىن يگەرىپ، ەلدىك رۋحتى، مەملەكەتتىك مۇددەنى توگىلە جىرلاپ، قيىن دا كۇردەلى تاقىرىپتى جان-جاقتى اشا ٴبىلۋى بولاشاقتارىنان مول ٴۇمىت كۇتتىرەدى. سونداي-اق، قاراعاندىلىق ابزال بوكەن، ٴىلياس مۇقايەۆ، جەزقازعاندىق كەنجەباي احمەتوۆ، الماتىلىق رافاەل نيازبەكوۆ، استانالىق تالعات ەشەن ۇلى سياقتى تانىمال اقىندار دا ٴوز بيىكتەرىنەن كورىنە ٴبىلدى. جالپى العاندا، ەل تاۋەلسىزدىگىن ۇلت بولاشاعىن، حالقىمىزدىڭ ازاتتىق جولىنداعى ەرلىك تاريحىن، جاڭا زاماننىڭ جارقىن كەلبەتىن ولەڭمەن ورنەكتەپ، ەلباسىمىز ٴوز قولىمەن ورناتقان استانانىڭ جىر-شەجىرەسىن جاساۋدى ماقسات ەتكەن ٴمۇشايرا دىتتەگەن جەرىنە جەتتى. 
اكادەميك، فيلولوگيا عىلىمدارىنىڭ دوكتورى، پروفەسسور، ەۋرازيا ۇلتتىق ۋنيۆەرسيتەتىنىڭ فيلولوگيا كافەدراسىنىڭ مەڭگەرۋشىسى سەيىت قاسقاباسوۆ ٴتوراعالىق ەتكەن، قۇرامىندا جازۋشى، مەملەكەتتىك سىيلىقتىڭ لاۋرەاتى قويشىعارا سالعارا ۇلى، اقىن، مەملەكەتتىك سىيلىقتىڭ لاۋرەاتى نەسىپبەك ايت ۇلى، حالىقارالىق «الاش» سىيلىعىنىڭ يەگەرى سەرىك اقسۇڭقار ۇلى، اقىن، «تۇمار» جۋرنالىنىڭ باس رەداكتورى وڭايگۇل تۇرجان بار قازىلار القاسى ٴمۇشايرعا تۇسكەن شىعارمالاردى مۇقيات وقىپ، ساراپتاپ، سارالاپ، اقىلداسا كەلە تومەندەگىدەي شەشىم شىعاردى:
باس جۇلدە – تەمىر تۇلپاردى سەمەيلىك جاس اقىن ارمان شەريزاتوۆ تاقىمىنا باستى. ٴبىرىنشى ورىندى (1 ميلليون 500 مىڭ تەڭگە) الماتىلىق تالانتتى قىزىمىز اقسۇيرىك ٴىزمۇقانوۆا قانجىعاسىنا بايلاندى. ەكى ەكىنشى ورىندى (800 مىڭ تەڭگەدەن) قاراعاندىلىق قوس اقىن - ابزال بوكەن مەن ٴىلياس مۇقايەۆ يەلەندى. ٴۇشىنشى ورىنعا تىگىلگەن ٴۇش جۇلدەنى (400 مىڭ تەڭگەدەن) حالىقارالىق «الاش» سىيلىعىنىڭ يەگەرى، «شەشەنستاننىڭ حالىق باتىرى»، الماتىلىق رافاەل نيازبەكوۆ، جەزقازعاندىق كەنجەباي احمەتوۆ جانە استانالىق بەلگىلى اقىن تالعات ەشەن ۇلى ٴوزارا ٴبولىستى. بەس ىنتالاندىرۋ سىيلىعىن (150 مىڭ تەڭگەدەن) مونعوليالىق قارت اقىن شىناي راحمەت ۇلى، الماتىلىق باتىق ٴماجيت ۇلى، قىتاي حالىق رەسپۋبليكاسىنىڭ ازاماتى سەرىك ٴتۇسىپحان ۇلى، اقتوبەلىك بالتابەك نۇرعاليەۆ، اياگوزدىك جاس تالاپكەر ٴبىرجان احمەر قاتارلى اقىندار ەنشىلەدى. سونداي-اق، ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، استانا قالالىق ٴتىل باسقارماسىنىڭ باستىعى ەربول تىلەشەۆ، استاناداعى «فوليانت» باسپاسىنىڭ ديرەكتورى نۇرلان يسابەكوۆ تاعايىنداعان ٴۇش ارنايى سىيلىق (100 مىڭ تەڭگەدەن) استانالىق باقىتجان توباياقوۆقا، شىمكەنتتىك جارىلقاسىن بورانبايەۆقا، اقتوبەلىك گۇلجاينار قالديناعا بۇيىردى. 
جۇلدە العان جانە ٴمۇشايرا قورجىنىنا كەلىپ تۇسكەن شىعارمالاردىڭ تاڭداۋلىلارى جىل اياعىنا دەيىن جەكە كىتاپ بولىپ باسىلادى.
جۇلدەگەرلەردى ماراپاتتاۋ ٴراسىمى استاناداعى «كونگرەسس حولل» سارايىندا 1 شىلدە كۇنى كەشكى 18.00 ساعاتتا ونەر جۇلدىزدارىنىڭ قاتىسۋىمەن وتەدى.
 
 
 
سەرىكحان سابىربەكوۆ،
س.سەيفۋللين مۇراجايى 
ديرەكتورىنىڭ ورىنباسارى، 
قازىلار القاسىنىڭ 

جاۋاپتى حاتشىسى 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي