BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قۇمىرسقا تىرلىك...

 قامشىنىڭ سابىنداي بولعان قىسقا عۇمىر ٴوتىپ بارادى...
اللادان بەرىلگەن ٴومىردىڭ قاي كۇنى، قاي ساعاتتا اياقتالارىن ەشكىم ٴدوپ باسىپ ايتا الماc. از جاسارىمىزدى، كوپ جاسارىمىزدى جاراتۋشى يەم بىلەر.
ەكى عاسىردى كورگەن، ەكى ٴتۇرلى قوعامدى باستان كەشىرىپ جاتقان باقىتتى ۇرپاقپىز.
بالكىم، كوشپەلى قازاقى ٴومىردى كورگەن، كوشپەندىلىكتىڭ قالا ٴداستۇرىن مەڭگەرگەن سوڭعى ۇرپاعى ٴبىزبىز. ولاي دەيتىنىم: قازىرگى اۋىلدىڭ ٴوزى كوشپەندىلىكتەن ارىلعالى قاي زامان. بۇنى وركەنيەت دەيسىز بە، جوق الدە قازاقتىڭ اتا داستۇرىنەن ايىرىلۋى دەيسىز بە، ٴوزىڭىز بىلەسىز؟
دالاسى مەن تاۋىن پانا كورگەن قۇسقانات قازاقتىڭ قاۋىرسىنى قايدا ۇشپادى، بالاق ٴجۇنى قايدا شاشىرامادى، توپشىسى قايدا سىنبادى؟
قۇز بەن شىڭدى مەكەن ەتكەن، سەڭگىر كوكتى كەرەگە قاناتىمەن ٴتىلىپ عۇمىر كەشكەن اتا قىران، كۇندەردىڭ ٴبىر كۇنىندە اڭشىنىڭ تورىنا تۇسسە، اياعىنا جىبەكتەن باۋ تاعىلسا، باسىنا جارىق دۇنيەنى كورمە دەپ توماعا كيگىزىلسە، ٴسويتىپ اعاش تۇعىرعا وتىرعىزىلسا نە ويلار ەدى؟..
«اسپاندا جۇزدەگەن شاقىرىم بيىكتىكتە قالىقتاپ جۇرگەن اقيىق، جەردەگى قالباڭداپ كۇن كەشىپ جۇرگەن قۇمىرسقانى كورەدى»- دەيدى.
قىرانعا ٴتان قىراعىلىق باسقا بىردە-بىر جان-جانۋارعا بەرىلمەسە كەرەك.
ال، سول قىراندى توماعا كيگىزىپ، جەردەگى قۇمىرسقامەن بىرگە ماتاپ ۇستاۋ اقىلعا سيا ما؟
مەن، بابالارىمنىڭ تىرلىگىن اتا قىراننىڭ تاعدىرىنا بالايتىن ۇرپاعىمىن. ەسىمدى جيعان بالا كۇندەرىمدە قوزى، قوي باعىپ تالاي تاۋ مەن تاستى كەزدىم. ۇنەمى ٴبىزدىڭ تاستار مەن تاۋلاردان تاۋەشكى، ارقار بەينەسىندەگى سۋرەتتەردى، تۇسىنىكسىز كونە جازۋلاردى كورەتىنمىن. ادام بەينەسىندەگى بالبالتاستاردى جاستانىپ وستىك. بالبالدارعا سۇيەنىپ وتىرىپ قازاقتىڭ ەپوستىق، ليرو-ەپوستىق جىرلارىن جاتتادىق. «ەڭلىك- كەبەك»، «مۇڭلىق-زارلىق»، «كەرىم-تورىم»، «حاسەن-جاميلا» ت.ب. قيسسا-داستاندارى وقىدىق. بەردىبەك سوقپاقبايەۆتىڭ «مەنىڭ اتىم-قوجا»، «ولگەندەر قايتىپ كەلمەيدى...»، ساپارعالي بەگاليننىڭ «قىران تۋرالى اڭىز» ت.ب. ٴبىرشاما كوركەم تۋىندىلاردى مەكتەپكە بارماي-اق وقىعان، وقىمىستى قويلى اۋىلدىڭ بالاسىمىز.
ٴبىزدىڭ بالالىق قيالىمىز شەكسىز ەدى... ارمانىمىز اسقارلارمەن استاسىپ، ويىمىز بۇلتتارمەن بىرگە كوكتە قالىقتاپ جۇرەتىن. كۇمىس شاقشاسىن ەتىگىنىڭ قونشىنا ۇزاق ۇرىپ، مۇرتىن شيراتىپ اسىقپاي ناسىباي اتاتىن، ٴسۇرى سىباعالى جامباستى قيعاشتاپ كەسە وتىرىپ، وتكەن-كەتكەننەن قيلى-قيلى اڭگىمەلەر شەرتەتىن شالداردىڭ اۋىز ەكى اڭگىمەلەرىنە قۇلاعىمىز تۇرىك جۇرەتىن. بۇل مەنىڭ بالالىعىمنىڭ ٴبىر ساتتىك قانا كورىنىستەرى. وسىلاردىڭ ٴبارىن ايتىپ وزىڭە العاش رەت ولەڭمەن ەمەس، قاراسوزبەن حات جازىپ وتىرمىن. نەگە، ولاي ىستەگەنىمدى سەن تۇگىلى ٴوزىم دە تۇسىنبەيمىن!.. سەن، مەنى ٴتۇسىنىپ، تىڭداي الاتىن جەر بەتىندەگى جالعىز ادامسىڭ.
بيىك كوكتەن بىرتىندەپ قۇلدىراپ جەرگە تۇسكەن ٴبىزدىڭ «قۇمىرسقا تىرلىگىمىز» جايلى ەندى ٴوزىڭ سويلەشى!؟..

 

 

ەربول بەيىلحان

 

 

 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي