BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قۇلاي ٴسۇيۋ – سيرەك قونار باق قۇسى (عاشىقتار كۇنىنە ارنالعان)

استانا. 15 ٴساۋىر. baq.kz - بۇگىن ۇلتتىق عاشىقتار كۇنى. وسى مەرەكەگە وراي، وڭتۇستىك قازاقستان وبلىسىنىڭ تۋماسى اقىن-جۋرناليست عابيت ساپاربەكوۆتىڭ «قۇلاي ٴسۇيۋ – سيرەك قونار باق قۇسى» اتتى ولەڭىن ۇسىنامىز.  

«عاشىقپىن» دەپ ايتۋ وڭاي بولعانمەن،
عاشىق بولۋ قيىنداردىڭ قيىنى.
كورىنگەنگە كەزىگىپ كوز سالعانمەن،
شەشىلمەيدى جۇرەكتىڭ سىر، ٴتۇيىنى.
«ماحاببات» دەپ ايتۋشى ەدى ۇلكەندەر،
«ول نە ەكەن؟» دەۋشى ەدىم تاڭدانىپ.
سويتسەم سەزىم بولىپ شىقتى مۇڭ تەربەر،
قاپيادا قالا-تۇعىن اربالىپ.
مەكتەپ باردىم، حات تانىدىم، وقىدىم،
سەزىنگەندەي بولدىم ٴبىلىم اسقارىن.
ەڭ العاشقى شىعارمامدى اقىرىن،
وتان، انا جايلى جىردان باستادىم.
بالا ەدىك، بالاڭ ەدىك، پاك ەدىك،
كۇلكىمىز دە بولۋشى ەدى رياسىز.
ويىن ويناپ، قىزىقتارعا سان ەرىپ،
جۇرگەن شاقتى قالاي عانا قياسىز؟
نازىك قانا سارى قىزبەن سۇيكىمدى،
بىرگە وقىدىق، كىتاپ بەتىن سان اشىپ.
ٴبىر پارتادا وتىرام دەپ سول قىزبەن،
ٴجۇرۋشى ەدىك ٴبىر توپ بالا تالاسىپ.
ورالماستاي عاجايىپ بال شاق كەتتى،
ساعىنامىن سول كۇندەردى كەيدە وسى.
سارى قىزدىڭ جانارىندا قاپ كەتتى،
بالا ماحابباتىمنىڭ اق بەينەسى.
جۇرەك – پاتشا، ٴاربىر ٴسوزى زاڭ ماعان،
ٴامىرى دە ورىندالار مۇلتىكسىز.
العاش رەت جان-دۇنيەمدى ارباعان،
سول جاناردى ىزدەپ ٴجۇرمىن كىرشىكسىز.
بالالىعىم كەتتى جانە كەلدى كۇز،
دۇنيەنى تانىدىم دا سەلك ەتتىم.
قيالداعى جاندى كۇتەم بەلگىسىز،
وزگەسىنە بۇرىلماۋعا سەرت ەتتىم.
«عاشىقپىن» دەپ ايتۋ وڭاي بولعانمەن،
قۇلاي ٴسۇيۋ – سيرەك قونار باق قۇسى.
سول باقىتقا جولىعادى تۇبىندە،
سەزىمگە ادال، جان-جۇرەگى اق كىسى.

عابيت ساپاربەكوۆ (وقو)
 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي