BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا يسپان-قازاق تىلىندە شىققان «توزاق شەڭبەرلەرى» اتتى پوەزيا كىتابىنىڭ تۇساۋكەسەرى وتەدى (فوتو)

استانا. 27 ٴساۋىر. baq.kz – 29 ٴساۋىر كۇنى ساعات 10.00-دا ەۋرازيا ۇلتتىق ۋنيۆەرسيتەتىنىڭ باس عيماراتىندا يسپانيانىڭ ۇلى اقىنى حۋستو حوركە پادروننىڭ تۇڭعىش رەت يسپان-قازاق تىلىندە شىققان «توزاق شەڭبەرلەرى» اتتى پوەزيا كىتابىنىڭ تۇساۋكەسەر ٴراسىمى وتەدى.

تۇساۋكەسەر راسىمىنە يسپان پەن كلۋبىنىڭ باس حاتشىسى، نەوپوليتان جانە ماللارمە پاريج اكادەمياسىنىڭ كوررەسپوندەنت-مۇشەسى، ەۋروپا اقىندارى فەستيۆالىنىڭ نەگىزگى قۇرىلتايشىسى حۋستو حوركە پادروننىڭ ٴوزى، يسپانيانىڭ قازاقستانداعى ەلشىسى مانۋەل لارروتچا، ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ جانە وسى كىتاپتى اۋدارعان اقىن، «قازاقستان» ۇلتتىق تەلەارناسىنداعى «پوەزيا الەمى» باعدارلاماسىنىڭ پروديۋسەرى تاناكوز تولقىنقىزى قاتىسادى.

بۇل تۋىندى كەزىندە يسپانيادا عانا ەمەس، تۇتاس ەۋروپادا بەس جىل قاتارىنان ۇلكەن رەزونانس تۋدىرعان شىعارما. لاتىن امەريكاسىنىڭ جاڭا پروزاسىنىڭ نەگىزىن قالاۋشى حوركە لۋيس بورحەستىڭ ٴوزى حۋستو پادرونىڭ بۇل كىتابىنا «حوركەنىڭ «توزاق شەڭبەرلەرى» تۋىندىسى ۇزاق جىلداردان كەيىن مەنى قاتتى قوبالجىتىپ، قايعىرتىپ، ەڭكىلدەپ جىلاتقان بىردەن ٴبىر كىتاپ بولدى» دەپ باعا بەرگەنى تەگىن بولماسا كەرەك. حۋستو حوركە پادرون يسپان ٴتىلى كورول اكادەمياسىنىڭ «فاستەنرات» سىيلىعىن فەدەريكو گارسيا لوركادان كەيىن العان تاريحتاعى ەكىنشى اقىن. سودان بولار ەدموند ۆاندەركامەن «حۋستو حوركە پادرون - ۇلى اقىن. ول فەدەريكو گارسيا لوركانىڭ ورنىن باسۋعا ابدەن لايىق» دەگەن.

بۇگىنگى كۇنگە دەيىن الەمنىڭ وتىز توعىز تىلىنە اۋدارىلعان اتالمىش تۋىندىنى فرانسۋز تىلىنەن قازاق تىلىنە 40-شى بولىپ ٴتارجىمالانۋىنا يسپانيانىڭ قازاقستانداعى ەلشىلىگى دەمەۋشى بولدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي