BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ماڭگى موتور جوبالارىن قارامايمىز

رەداكسياعا كوپ ادام حابارلاسادى. اپەرباقاندار دا، پاراساتتىلار دا. سولاردىڭ ىشىندەگى ٴبولىپ ايتاتىنىم - بالاسىنىڭ تالانتىن (عىلىمداعى، ونەردەگى) پاش ەتپەكشىلەر.

بۇل جەردە كۇمىلجىتەتىنى - ەتيكالىق ماسەلە. كوبىنە بالانىڭ جەتىستىگى اتا-اناسىنا عانا ەلدەن ەرەك كورىنۋى مۇمكىن. ال مەملەكەت، ونىڭ سىرتىندا - الەمدىك دەڭگەيدە كوپتىڭ ٴبىرى بولۋى كادىك. ونى ارينە، اتا-اناعا ايتا المايسىڭ. كورە الماعانداي بولىپ كورىنۋ ٴقاۋپى بار. "كورە العاننىڭ" وزىندە، بىرەۋدىڭ باۋىر ەتىندەي بالاسىن قالايشا سىناپ-مىنەيسىڭ؟

ال قوبالجىتاتىنى - جەتكىنشەكتىڭ جەتىستىگىن كورسەتۋگە قاڭعىر-كۇڭگىر ايقاي، داڭعازا-داقپىرت مودەلىن تاڭداعان اتا-انالار. كەيبىر اكەلەر مەن شەشەلەردى تىڭداپ وتىرىپ، بالاسىن كوتەرمەلەۋ ٴۇشىن "كوپقادامدى جوسپار"(copyright پۋتين) جاساپ قويعانىن، سەنىڭ اقپاراتتىق قولداۋىڭ - سول ۇلى جوسپاردىڭ ٴبىر ساتىسى عانا ەكەنىن ٴتۇسىنىپ، توبە شاشىڭ تىك تۇرادى. الدىمەن سالالاس/باقتالاس ادامدارعا ٴتيىسىپ، سوسىن ولار جاۋاپ تالاپ ەتكەندە - ٴوز بالاسىنىڭ ەڭبەگىن/ونەرىن شىعارا قويۋ سياقتى قيامپۇرىس سحەمالاردى جاساعان اتا-انالاردىڭ تالەيراننىڭ، كاردينال ريشەلەنىڭ يا سەر ۋولسينگەمنىڭ رەينكارناسياسى ەمەسىنە كەپىلدىك جوق.

سول اتا-انالارعا ٴوتىنىش (قۇلاق اسپايتىندارىڭىزدى كوردىم ٴبىراق، سوندا دا). حايپ - تەك ٴبىر ساتتىك جارىلىس. ەشتەڭە ويلاپ شىعارىپ وتىرعانىم جوق، دياگراممادا دا سولاي. جانە تەرموديناميكالىق تەپە-تەڭدىكتى بۇزىپ شىعاتىن كۇشى جوق: نەعۇرلىم تەز تانىلسا، جادىدان سوعۇرلىم تەز وشەدى. ٴيا، ٴارى قاراي، حايپقا حايپ قوسىپ دۇرلىكتىرە بەرۋگە بولادى. ٴبىراق، سەن شارشاماعانمەن، بالاڭ بولدىرماي ما؟ «قيارعا دا پيار كەرەك» ەكەنىن بىلەمىز (copyright د.يسابەكوۆ)، ٴبىراق بالانىڭ بالالىق شاعىنىڭ ەسەبىنەن ەمەس شىعار.

تاعى ٴبىر قۇلاققاعىس. ارنايى باسىلىم بولماسا، جالپى رەداكسيالاردا عىلىمي ساراپتاما جاسايتىن وكىلەت تە، قاۋقار دا جوق. سوندىقتان تەك "قازاققا كەرەك!" دەگەن نەگىزدەمەسىنە بولا، "اينالايىن-اي!" دەپ جاريالايتىن ٴبىز جوق.

ايتپاقشى، كەكتەنبەڭىزدەر. ٴبىز جاريالاماعان ەڭبەك شىنىمەن عىلىمي جاڭالىق بولىپ شىعىپ، عىلىمدى اۋدارىپ تۇسىرسە - تەك قۋانامىز. ٴبىراق جاريالاماعانىمىزعا ٴبارىبىر وكىنبەيمىز. جەتكىنشەكتەر ٴوسسىن، ٴونسىن، وزىنە، ەلگە قىزمەت قىلسىن. تىلەگىمىز وسى عانا.

Ерлан Оспан
9166

استانا بيۋرگەرى، ۇساق بۋرجۋا.