BAQ.kz - Қазақстан жаңалықтары USD 377.62 BAQ.kz - Қазақстан жаңалықтары EUR 426.03 BAQ.kz - Қазақстан жаңалықтары RUB 5.67
استانا:

بۇگىن مەنىڭ تۋعان كۇنىم

00:00 / 1:46

بۇگىن مەنىڭ تۋعان كۇنىم. جاسىم الپىسقا كەلىپتى. جەتكەن جەتىستىگىم دە بار. جەتپەگەن بيىكتەرىم دە قول بۇلعايدى. شىندىعىندا مەن ويلاعان ماقساتىمنىڭ ٴبىرازىنا جەتىپپىن. ماماندىق تاڭداۋدا اركەز جولىم بولدى. جۇسىپبەك ەلەبەكوۆتەي ۇلى ۇستازدان ٴدارىس الدىم. تەمىربەك قوجاكەەۆتەي عۇلاما ۇستاز مەنى جۋرناليستيكا سالاسىنا دايىندادى. اركەز قامقور بولدى. قازاق راديوسىندا وتىز جىلداي ەڭبەك ەتىپ، جاقسىلارمەن جاقىن ٴجۇرىپ، ٴوي-ورىسىم كەڭەيدى. قازاق ونەرىنىڭ مايتالماندارىنىڭ ٴومىرى مەن ونەرىن زەرتتەپ، قانشاما راديو حابارلار دايىندادىم. ٴانشى رەتىندە قالىپتاستىم.

ۇكىمەت ەڭبەگىمدى ەرەكشە باعالاپ، «قازاقستاننىڭ ەڭبەك سىڭىرگەن قايراتكەرى»، قر مادەنيەت قايراتكەرى، قازاقستان جۋرناليستەر وداعى سىيلىعىنىڭ لاۋرەاتى اتاقتارىن بەردى.

شالعايدا، سوناۋ سولتۇستىك قازاقستان وبلىسى شالاقىن اۋدانى ورتاقكول دەگەن شاعىن اۋىلدا جاتىپ، رەسپۋبليكاعا ٴوزىنىڭ دارىنىمەن تانىمال بولعان، جەتى سىنىپتىق بىلىمىمەن ون جەتى كىتاپ جازىپ، اقپارات اعىنىنا توقتاۋسىز ۇلەس قوسقان ارداقتى اكەم زەينەل-عابي يمانبايەۆ پەن ون بالا تاربيەلەگەن باتىر انا كامەش بايقاسقىزىنىڭ ايالى الاقانىندا وسكەنىمە ٴوزىمدى باقىتتى سانايمىن. العاشقى ۇلدارى شەتىنەپ كەتكەن سوڭ، ىلعي قىز تۋا بەرگەن انام جەتىنشى قىزدان سوڭ ەكى ۇل، ٴبىر قىز ومىرگە اكەلدى. مەن التىن دەگەن التىنشى قىزىمىن. انام مەنى التى كۇن تولعاتىپ، ارقانعا اسىلىپ تۋا الماي، ٴۇش شاقىرىمداعى سوۆحوز پەرزەنتحاناسىندا اۋىل فەلشەرىنىڭ كومەگىمەن زورعا بوسانىپتى. انام سونشا بەينەت شەگىپتى. مىنە، سونىڭ ىزدەرى مەنىڭ دەنساۋلىعىما دا اسەر ەتتى. وسى جايلى اكەمنىڭ «تولعاق» دەگەن اڭگىمەسى بار. بۇل اڭگىمە قازاق راديوسىنىڭ التىن قورىندا ساقتالعان. بۇگىن مەن وسى جاسقا جەتكەنىمە اۋەلى اللاعا تاۋبە، سودان سوڭ اناما مىڭ العىس دەيمىن. مەن دە انا، اجە بولدىم. مەن تۋعان كۇنىمە وراي انام جايلى جازىلعان ولەڭىمدى سىزدەرگە ۇسىنىپ وتىرمىن. سونداي-اق انام كامەش بايقاسقىزىنىڭ ٴبىزدى الديلەگەندە ايتاتىن كوپ اندەرىنىڭ ٴبىرى- ابايدىڭ «كوزىمنىڭ قاراسى» ٴانىن تىڭدايسىزدار.

ساعىندىم

كۇيكەنتاي ٴبىتىم اجىمگە تولى اق ٴجۇزى،

جەمىسىن بەرىپ، جەتكەندەي ەندى باق كۇزى.

ونەگە بولعان ىسىمەن ۇلگى ۇرپاققا،

ارتىندا قالار تىندىرعان ۇلگى جاقسى ٴىسى،

انامدى اسىل ساعىندىم.

بەسىگىن تەربەپ، ۇيقىسىز تاڭدى اتىرعان،

التىننىڭ قالعان سىنىعى جانى اسىلدان.

عۇمىرىن ارناپ بىزدەرگە بەرگەن تاربيە،

ماقتانىش ەتىپ جاقسىمىز بولسا اسىرعان،

انامدى اسىل ساعىندىم.

ون بالا ٴسۇيىپ، بەينەتىن كورىپ وسىرگەن،

قاتەمىز بولسا تۇزەتىپ ٴوزى كەشىرگەن.

باعىپ تا قاعىپ ەڭبەگى سىڭگەن ٴبىز ٴۇشىن،

ٴبارى دە مەنىڭ كەتپەيدى، انا، ەسىمنەن،

ٴوزىڭدى، اپا، ساعىندىم.

Алтын Иманбаева
49575